കോഴിക്കോട്: കേരള ഫാര്‍മസിസ്റ്റ്‌സ് ഓര്‍ഗനൈസേഷന്റെ മേല്‍നോട്ടത്തില്‍ രൂപീകൃതമായ കെപിഒ മോഡല്‍ ഫാര്‍മസി എന്ന കമ്പനിയുടെ കീഴില്‍ കോഴിക്കോട് പന്തീരാങ്കാവ് ബൈപ്പാസില്‍ പ്രവര്‍ത്തനമാരംഭിച്ച ഫാംസി ഫാര്‍മസി എംകെ മുനീര്‍ എംഎല്‍എ ഉദ്ഘാടനം ചെയ്തു. ഒളവണ്ണ ഗ്രാമപഞ്ചായത്ത് പ്രസിഡന്റ് ശ്രീമതി കെ. തങ്കമണി ആദ്യവില്‍പന നിര്‍വ്വഹിച്ചു.

24 മണിക്കൂറും തുറന്നു പ്രവര്‍ത്തിക്കുന്ന ഫാംസി ഫാര്‍മസി അന്താരാഷ്ട്ര നിലവാരം പുലര്‍ത്തുന്നതും ഫാര്‍മസി നിയമം 1948, ഡ്രഗ്‌സ് ആന്റ് കോസ് മെറ്റിക്‌സ് ആക്റ്റ് 1945, ഫാര്‍മസി പ്രാക്ടീസ് റെഗുലേഷന്‍സ് 2015 എന്നിവ പൂര്‍ണമായും പാലിച്ച് പ്രവര്‍ത്തിക്കുന്നതുമായ കേരളത്തിലെ  ആദ്യ ഔഷധവില്‍പനശാലയാണ്.

കേരളം മുഴുവന്‍ പ്രവര്‍ത്തനമാരംഭിക്കുന്ന ഫാംസി ഫാര്‍മസിയുടെ ആദ്യ സംരംഭമാണ് പന്തീരാങ്കാവില്‍ പ്രവര്‍ത്തനമാരംഭിച്ചതെന്നു ഭാരവാഹികള്‍ പറഞ്ഞു. സ്വദേശത്തും വിദേശത്തുമുള്ള 50 ഫാര്‍മസിസ്റ്റുകളുടെ കൂട്ടായ്മയാണ് ഇതിനു നേതൃത്വം നല്‍കുന്നത്.

മാനേജിംഗ് ഡയറക്ടര്‍ പ്രേംജി വയനാട് സ്വാഗതവും ചെയര്‍മാന്‍ സൈഫുദ്ദീന്‍ താരി നന്ദിയും പറഞ്ഞു.