റിയാദ്: സഊദിയില്‍ വിവിധ ഭാഗങ്ങളിലായി 250ലധികം പുരാതന ഗുഹകള്‍ കണ്ടെത്തിയതായി അന്താരാഷ്ട്ര ജിയോളജിക്കല്‍ സമ്മേളനം വ്യക്തമാക്കി. നേരത്തെ കണ്ടെത്തിയ ആയിരം ഗുഹകള്‍ക്കു പുറമെ പുതുതായി കണ്ടെത്തിയ ഗുഹകള്‍കൂടി ചേരുന്നതോടെ രാജ്യത്തെ ടൂറിസം മേഖലയുടെ വളര്‍ച്ചയ്ക്ക് ആക്കം കൂടുമെന്നും സമ്മേളനം അഭിപ്രായപ്പെട്ടു. സഊദി ജിയോളജിക്കല്‍ സര്‍വേ, സഊദി ഭൂമിശാസ്ത്ര സൊസൈറ്റി എന്നിവ സംയുക്തമായാണ് അന്താരാഷ്ട്ര ജിയോളജിക്കല്‍ സമ്മേളനം നടത്തിയത്.
ലോകത്ത് വിവിധ ഭാഗങ്ങളിലായി 5000 ഗുഹകളുണ്ട്. ഇവയെല്ലാം പ്രാദേശിക വിനോദസാഞ്ചാരത്തെ പുഷ്ടിപ്പെടുത്തുന്നവയാണ്. ഇവിടങ്ങളില്‍ സന്ദര്‍ശനം നടത്തുന്നതിനായി 250 ദശലക്ഷം വരെ സന്ദര്‍ശകരാണ് വര്‍ഷത്തില്‍ എത്തുന്നത്. ഏകദേശം രണ്ടു ബില്യണ്‍ ഡോളര്‍ ഇതുവഴി ഇവ സ്ഥിതിചെയ്യുന്ന രാജ്യങ്ങള്‍ക്കു ലഭിക്കുന്നുണ്ടെന്നും സമ്മേളനം അഭിപ്രായപ്പെട്ടു. 2000 മുതലാണ് രാജ്യത്തെ വിവിധ ഭാഗങ്ങളിലുള്ള ചരിത്ര പുരാതന ഗുഹകള്‍ കണ്ടെത്തി ടൂറിസം കേന്ദ്രങ്ങളാക്കി മാറ്റുന്നതിന് സഊദി ടൂറിസം വകുപ്പ് ശ്രമങ്ങള്‍ തുടങ്ങിയത്.