പയ്യന്നൂര്‍: പി.എസ്.എല്‍ വി- സി. 37ല്‍ 104 ഉപഗ്രഹങ്ങള്‍ ഭ്രമണപഥത്തിലെത്തിച്ച ഐ.എസ് ആര്‍.ഒയുടെ നേട്ടത്തിന് പിന്നില്‍ പ്രവര്‍ത്തിച്ച മലയാളിയായ മിഷന്‍ ഡയറക്ടര്‍ പയ്യന്നൂര്‍ അന്നൂരിലെ പി.കുഞ്ഞിക്കൃഷ്ണന്റെ നേട്ടം പയ്യന്നൂരിനും അഭിമാന നിമിഷം.

വിക്ഷേപണത്തിന് നേതൃത്വം നല്‍കിയ മലയാളികളില്‍ ഒരാള്‍ പയ്യന്നൂരുകാരനായ ഈ ശാസ്ത്രജ്ഞനാണ്.
വിക്ഷേപണം വിജയത്തിലെത്തിയപ്പോള്‍ അന്നൂരിലെ തറവാട്ട് വീട്ടില്‍ വിളിച്ച് അദ്ദേഹം ആഹ്ലാദം പങ്കുവച്ചു.
അന്നൂര്‍ യു.പി, പയ്യന്നൂര്‍ ബോയ്‌സ് സ്‌കൂള്‍, പയ്യന്നൂര്‍ കോളജ് എന്നിവിടങ്ങളിലെ വിദ്യാഭ്യാസത്തിന് ശേഷം തിരുവനന്തപുരം ശ്രീകാര്യം എഞ്ചിനീയറിങ് കോളജ് വഴിയാണ് അദ്ദേഹം തിരുവനന്തപുരം ഐ.എസ്.ആര്‍.ഒയിലെത്തിയത്.

തുടര്‍ന്ന് ഉപഗ്രഹ വിക്ഷേപണ രംഗത്ത് ഒട്ടേറെ ചരിത്ര ദൗത്യങ്ങളില്‍ അദ്ദേഹം പങ്കാളിയാവുകയും മേല്‍നോട്ടം വഹിക്കുകയും ചെയ്തു.
ഭാര്യ ഗിരിജ തിരുവനന്തപുരം ഐ.എസ്.ആര്‍.ഒയില്‍ എന്‍ജിനീയറാണ്.