റിയാദ്: സഊദിയിലെ മാധ്യമ സ്ഥാപനങ്ങളിലും സമ്പൂര്‍ണ്ണ സഊദി വല്‍ക്കരണം നടപ്പാക്കണമെന്ന് ശൂറ കൗണ്‍സില്‍. രാജ്യത്തെ മുഴുവന്‍ മാധ്യമ സ്ഥാപനങ്ങളിലെയും ജോലികള്‍ സഊദി വല്‍ക്കരിക്കണമെന്നും സ്വദേശികള്‍ക്ക് കൂടുതല്‍ തൊഴിലവസരങ്ങള്‍ സൃഷ്ടിക്കണമെന്നും സാംസ്‌കാരിക വാര്‍ത്താ വിതരണ മന്ത്രാലയത്തോട് ശൂറകൗണ്‍സില്‍ ആവശ്യപ്പെട്ടു. ശൂറകൗണ്‍സില്‍ വൈസ് പ്രസിഡന്റ് ഡോ: മുഹമ്മദ് ബിന്‍ അമീന്‍ അല്‍ ജിഫ്രിയുടെ അധ്യക്ഷതയില്‍ ബുധനാഴ്ച തലസ്ഥാനത്ത് ചേര്‍ന്ന യോഗത്തിലാണ് നിര്‍ദ്ദേശം.

യുവാക്കളെ ആകര്‍ഷിക്കുന്ന മേഖലയാണ് മാധ്യമ രംഗം. ഇതിനാല്‍ തന്നെ കൂടുതല്‍ തൊഴില്‍ നല്‍കുന്നതിനായി മാധ്യമ സ്ഥാപനങ്ങളില്‍ സമ്പൂര്‍ണ്ണ സ്വദേശി വല്‍ക്കരിക്കണം നടപ്പാക്കണം. ഇലക്‌ട്രോണിക്‌സ് മീഡിയ രംഗത്ത് മന്ത്രാലയത്തിന്റെ പ്രവര്‍ത്തനങ്ങള്‍ മെച്ചപ്പെടുത്തേണ്ടതുണ്ട്. കഴിവുള്ള മാധ്യമ പ്രവര്‍ത്തകരുടെ കൊഴിഞ്ഞു പോകുന്നത് തടയണമെനന്നും ശൂറകൗണ്‍സില്‍ ആവശ്യപ്പെട്ടു.

 
മാധ്യമ സ്ഥാപനങ്ങളില്‍ സമ്പൂര്‍ണ്ണ സ്വദേശി വല്‍ക്കരണം നടപ്പിലാക്കുന്നത് അറബ്, ഇംഗ്ലീഷ് അന്താരാഷ്ട്ര മാധ്യമ സ്ഥാപങ്ങളിലെ വിദേശ ജീവനക്കാര്‍ക്കാണ് ഭീഷണിയാകുക. ഇതര ഭാഷാ മാധ്യമ സ്ഥാപനങ്ങളില്‍ ഇത് എങ്ങനെ നടപ്പാക്കുമെന്നത് കണ്ടറിയേണ്ടിയിക്കുന്നു. നിലവില്‍ ലോകത്തെ ഒട്ടുമിക്ക പ്രമുഖ മാധ്യമ സ്ഥാപനങ്ങള്‍ക്കും സഊദിയില്‍ ഓഫിസുകള്‍ പ്രവര്‍ത്തിക്കുന്നുണ്ട്.