ജംഷഡ്പൂര്‍: സ്വന്തം തട്ടകത്തില്‍ നോര്‍ത്ത്ഈസ്റ്റ് യുനൈറ്റഡിനെ മറുപടിയില്ലാത്ത ഒറ്റ ഗോളിന് വീഴ്ത്തി കോപ്പലാശാന്റെ ജംഷഡ്പൂര്‍ എഫ്.സി സെമി പ്രതീക്ഷകള്‍ കൂടുതല്‍ സജീവമാക്കി. ജയത്തോടെ ചെന്നൈയിന്‍ എഫ്.സിയെ നാലാം സ്ഥാനത്തേക്ക് പിന്തള്ളി ജംഷഡ്പൂര്‍ മൂന്നാം സ്ഥാനത്തേക്ക് കയറി.
പന്തടക്കത്തിലും ആക്രമണത്തിലും അവസരങ്ങളൊരുക്കുന്നതിലും എല്ലാം നോര്‍ത്ത്ഈസ്റ്റ് മുന്നില്‍ നിന്നെങ്കിലും ഗോളടിക്കാന്‍ മറന്നുപോയത് അവര്‍ക്ക് തിരിച്ചടിയായി മാറി. ആദ്യ പകുതി ഗോള്‍രഹിതമായപ്പോള്‍ രണ്ടാം പകുതി തുടങ്ങി 51ാം മിനുട്ടില്‍ വെല്ലിങ്ടന്‍ പ്രിയോരിയാണ് ജംഷഡ്പൂരിന് വിജയമൊരുക്കിയ ഗോളിന് ഉടമയായത്. 15 മത്സരങ്ങളില്‍ നിന്ന് ഏഴാം വിജയം സ്വന്തമാക്കി 25 പോയിന്റുമായാണ് ജംഷഡ്പൂര്‍ മൂന്നാം സ്ഥാനത്തേക്ക് കയറിയത്.