കോഴിക്കോട്: പരിമിതികളെ മറികടന്ന് വേദികളില്‍ സര്‍ഗ വിസ്മയം തീര്‍ത്ത് ബഡ്‌സ് കലോത്സവം ശ്രദ്ധേയമാവുന്നു.
കുടുംബശ്രീ സംസ്ഥാന മിഷന്റെ നേതൃത്വത്തില്‍ സംഘടിപ്പിച്ച സംസ്ഥാന തല ബഡ്‌സ് കലോത്സവത്തിന് കോഴിക്കോട് ജെ.ഡി.ടി ഇസ്‌ലാമിക് എജ്യുക്കേഷനല്‍ കോംപ്ലക്‌സില്‍ തിരി തെളിഞ്ഞു. സ്റ്റേജ് - സ്റ്റേജിതര മത്സരങ്ങളിലായി 250 ഓളം വിദ്യാര്‍ഥികളാണ് മാറ്റുരച്ചത്.
കോഴിക്കോട് കോര്‍പറേഷന്‍ മേയര്‍ തോട്ടത്തില്‍ രവീന്ദ്രന്‍ കലോത്സവം ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡന്റ് ബാബു പറശ്ശേരി അധ്യക്ഷത വഹിച്ച ചടങ്ങില്‍ എ. പ്രദീപ് കുമാര്‍ എം.എല്‍.എ മുഖാതിഥിയായി. ജെ.ഡി.ടി ഇസ്‌ലാം ഓര്‍ഫനേജ് ആന്‍ഡ് എജ്യുക്കേഷനല്‍ ഇന്‍സ്റ്റിറ്റിയൂഷന്‍ പ്രസിഡന്റ് സി.പി കുഞ്ഞിമുഹമ്മദ്, കുടുംബശ്രീ മലപ്പുറം ജില്ലാ മിഷന്‍ കോ-ഓര്‍ഡിനേറ്റര്‍ സി.കെ ഹേമലത എന്നിവര്‍ ആശംസകള്‍ അര്‍പ്പിച്ചു. കുടുംബശ്രീ സംസ്ഥാന മിഷന്‍ പ്രോഗ്രാം ഓഫിസര്‍ അമൃത ജി.എസ് സ്വാഗതവും കോഴിക്കോട് ജില്ലാ മിഷന്‍ കോ-ഓര്‍ഡിനേറ്റര്‍ കവിത പി.സി നന്ദിയും പറഞ്ഞു.
ആദ്യദിനം മത്സരങ്ങള്‍ അവസാനിച്ചപ്പോള്‍ 16 പോയിന്റോടെ എറണാകുളം ജില്ലയാണ് മുന്നിട്ട് നില്‍ക്കുന്നത്.