ചെന്നൈ: തമിഴ്‌നാട്ടില്‍ കഴിഞ്ഞ വര്‍ഷം നടന്ന രാഷ്ട്രീയ ലയനങ്ങള്‍ക്ക് പിന്നില്‍ പ്രവര്‍ത്തിച്ചത് മോദിയാണെന്ന് വെളിപ്പെടുത്തല്‍. പളനി സാമിയുടെയും പനീര്‍ശെല്‍വത്തിന്റെയും ഇടയിലെ രാഷ്ട്രീയ നീക്കങ്ങള്‍ക്ക് പിന്നില്‍ പ്രവര്‍ത്തിച്ചിട്ടില്ലെന്ന ബി.ജെ.പിയുടെ വാദം ഇതോടെ പൊളിഞ്ഞു. പാര്‍ട്ടിയെ രക്ഷിക്കാനായി പളനി സാമിയുമായി ലയിക്കണമെന്ന് മോദി ആവശ്യപ്പെടുകയായിരുന്നുവെന്ന് പനീര്‍ശെല്‍വം പറഞ്ഞു. ന്യൂഡല്‍ഹിയില്‍ പ്രധാനമന്ത്രിയുമായി നടത്തിയ കൂടിക്കാഴ്ചയിലാണ് പാര്‍ട്ടിയെ രക്ഷിക്കാന്‍ പ്രധാനമന്ത്രിയോട് ആവശ്യപ്പെട്ടതെന്ന് അദ്ദേഹം പറഞ്ഞു.
തേനിയില്‍ കഴിഞ്ഞ ദിവസം നടന്ന എ.ഐ.എ.ഡി.എം.കെയുടെ ഭാരവാഹികളുടെ യോഗത്തിലാണ് തമിഴ്‌നാട് ഉപമുഖ്യമന്ത്രി കൂടിയായ പനീര്‍ശെല്‍വം ഇക്കാര്യം പറഞ്ഞത്.
തമിഴ്‌നാട് മന്ത്രിസഭയില്‍ അംഗമാകാന്‍ തനിക്ക് താല്‍പര്യമുണ്ടായിരുന്നില്ലെന്നും എന്നാല്‍ താന്‍ മന്ത്രിയാവണമെന്ന് നിര്‍ബന്ധിച്ചത് മോദിയായാണ്. പ്രധാനമന്തിയുടെ നിര്‍ദേശപ്രകാരം മാത്രമല്ല, പാര്‍ട്ടിയുടെ നന്മക്കായാണ് പളനി സാമിയുമായി ലയിച്ചതെന്നുംഅദ്ദേഹം പറഞ്ഞു.
ജയലളിത തന്നെ നാലു തവണ എം.എല്‍.എ ആക്കിയതും രണ്ട് തവണ മുഖ്യമന്ത്രിയാക്കിയതും തനിക്കുള്ള അംഗീകാരമാണെന്ന് പനീര്‍ശെല്‍വം പറഞ്ഞു. ജയലളിതക്കെതിരേ 2001, 2014 കാലങ്ങളില്‍ കേസ് വന്നപ്പോള്‍ പനീര്‍ശെല്‍വമായിരുന്നു മുഖ്യമന്ത്രി. വ്യക്തമായ സ്വാധീനമില്ലാത്ത തമിഴ്‌നാട് രാഷ്ട്ീയത്തില്‍ ബി.ജെ.പി ഇടപെട്ടുവെന്നാണ് പനീര്‍ശെല്‍വത്തിന്റെ പുതിയ വെളിപ്പെടുത്തലിലൂടെ വ്യക്തമാവുന്നത്.
പളനിസാമി- പനീര്‍ശെല്‍വം പാര്‍ട്ടി ലയനത്തെ സംബന്ധിച്ച് ആദ്യമായാണ് പരസ്യ വെളിപ്പെടുത്തല്‍ പുറത്തുവരുന്നത്. കേന്ദ്രസര്‍ക്കാരിലെ പാവകളാണ് ഇരു സഖ്യങ്ങളെന്ന് തമിഴ്‌നാട് പ്രതിപക്ഷ ആരോപണം ഉയര്‍ത്തിയ സാഹചര്യത്തിലാണ് പനീര്‍ശെല്‍വത്തിന്റെ പ്രസ്താവന.
തമിഴ്‌നാട് മുഖ്യമന്ത്രി ജയലളിതയുടെ മരണത്തോടെയാണ് എ.ഐ.എ.ഡി.എം.കെ രണ്ടായി പിളരുന്നത്. ഇതില്‍ പളനിസാമി ശശികലയുടെ പക്ഷത്ത് നിലയുറപ്പിച്ചു. പനീര്‍ശെല്‍വം വിമതനായിരുന്നു.
പിന്നീട് രണ്ടുപേരും ഒന്നിക്കുകയും ശശികലയെയും ദിനകരനെയും എ.ഐ.ഡി.എം.കെയില്‍ നിന്ന് പുറത്താക്കുകയുമായിരുന്നു.