പാരിസ്: ലൈംഗിക അപവാദ കേസില്‍ പാരിസില്‍ പൊലിസ് കസ്റ്റഡിയില്‍ കഴിയുന്ന പ്രമുഖ അക്കാദമിക പണ്ഡിതന്‍ താരിഖ് റമദാനെ ആശുപത്രിയില്‍ പ്രവേശിപ്പിച്ചു. ശരീരത്തിന്റെ വിവിധ ഭാഗങ്ങളില്‍ കല്ലിച്ചതിനെ തുടര്‍ന്നാണിതെന്ന് റമദാനുമായി അടുത്ത വൃത്തങ്ങള്‍ അറിയിച്ചു.
കസ്റ്റഡിയില്‍ കഴിയുന്ന റമദാനെ വെള്ളിയാഴ്ച രാത്രി തന്നെ ആശുപത്രിയില്‍ പ്രവേശിപ്പിച്ചിരുന്നു. വിവരം ഇന്നലെയാണു പുറത്തുവന്നത്. സ്വതന്ത്ര്യ മെഡിക്കല്‍ സംഘം അദ്ദേഹത്തിന്റെ ആരോഗ്യ സ്ഥിതി പരിശോധിക്കുമെന്നാണ് അറിയുന്നത്. ഇതിനനുസരിച്ചായിരിക്കും റമദാന്റെ കസ്റ്റഡി കാലാവധി നീട്ടുക.
റമദാന്റെ ആര്യോഗസ്ഥിതി വളരെയധികം മോശമായിക്കൊണ്ടിരിക്കുകയാണെന്നും അദ്ദേഹത്തെ സന്ദര്‍ശിക്കാന്‍ ഭാര്യയെയും മക്കളെയും ജഡ്ജിമാര്‍ അനുവദിച്ചിട്ടില്ലെന്നും അദ്ദേഹത്തിന്റെ അഭിഭാഷകര്‍ ആരോപിച്ചു.
പ്രമുഖ അക്കാദമിക പണ്ഡിതനായ റമദാന്‍ ഓക്‌സ്ഫഡ് സര്‍വകലാശാലയില്‍ പൗരസ്ത്യ പഠനവിഭാഗത്തില്‍ പ്രൊഫസറാണ്. ലൈംഗിക ആരോപണത്തെ തുടര്‍ന്ന് ഈ മാസം രണ്ടിനാണ് 54കാരനെ പാരിസ് പൊലിസ് കസ്റ്റഡിയിലെടുത്തത്.
ആരോപണം കെട്ടിച്ചമച്ചതെന്നാണ് റമദാന്റെ വാദം.