ഗസ്സ: ഫലസ്തീനിലെ ഗസ്സാ മുനമ്പില്‍ ഇസ്‌റാഈല്‍ വ്യോമാക്രമണം. അതിര്‍ത്തിയില്‍ ഹമാസ് ആക്രമണം നടത്തി എന്ന് ആരോപിച്ചാണ് ഗസ്സയിലെ ഹമാസ് കേന്ദ്രങ്ങളിലേക്ക് ഇസ്‌റാഈല്‍ വ്യോമസേന റോക്കറ്റ് ആക്രമണം നടത്തിയത്. സംഭവത്തില്‍ രണ്ട് ഫലസ്തീനി കൗമാരക്കാര്‍ കൊല്ലപ്പെട്ടതായി പ്രാദേശിക ആരോഗ്യ വൃത്തങ്ങള്‍ അറിയിച്ചു.
ഹമാസുമായി ബന്ധമുള്ള 18 കേന്ദ്രങ്ങളെ ലക്ഷ്യമിട്ടാണ് ഇസ്‌റാഈല്‍ സൈന്യം ആക്രമണം നടത്തിയത്. ശനിയാഴ്ച രാത്രി ആരംഭിച്ച ആക്രമണം ഞായറാഴ്ച രാവിലെ വരെ നീണ്ടു.
2014ല്‍ ഗസ്സയില്‍ ഇസ്‌റാഈല്‍ നടത്തിയ മനുഷ്യക്കുരുതിക്കു ശേഷം നടന്ന ഏറ്റവും ശക്തമായ ആക്രമണമാണിത്. ഹമാസിന്റെ ആയുധപ്പുരകള്‍, സൈനിക പരിശീലന കേന്ദ്രങ്ങള്‍, നിരീക്ഷണകേന്ദ്രങ്ങള്‍, തുരങ്കപാതകള്‍ എന്നിവിടങ്ങളെ ലക്ഷ്യമാക്കിയാണ് വ്യോമാക്രമണം നടന്നതെന്ന് ഇസ്‌റാഈല്‍ സൈന്യം അവകാശപ്പെട്ടു. കൊല്ലപ്പെട്ടവരില്‍ ഒരാള്‍ ഗസ്സ സ്വദേശിയായ 17കാരനാണ്. ശനിയാഴ്ചയും ഇസ്‌റാഈല്‍ ആക്രമണത്തില്‍ രണ്ട് ഫലസ്തീനി കൗമാരക്കാര്‍ കൊല്ലപ്പെട്ടിരുന്നു.
മൂന്ന് ഹമാസ് സൈനിക പരിശീലനകേന്ദ്രങ്ങള്‍ക്കും ഒരു മറ്റൊരു സംഘടനയുടെ ആസ്ഥാനത്തിനും ആക്രമണത്തില്‍ കേടുപാടുകള്‍ സംഭവിച്ചതായി ഫലസ്തീന്‍ അധികൃതര്‍ അറിയിച്ചു.
ഇസ്‌റാഈല്‍ വ്യോമാക്രമണത്തെ മിസൈല്‍വേധ സംവിധാനം ഉപയോഗിച്ച് തകര്‍ത്തതായി ഹമാസിന്റെ സൈനിക വിഭാഗമായ ഖസ്സാം ബ്രിഗൈഡ്‌സ് അവകാശപ്പെട്ടു.
ശനിയാഴ്ച ഇസ്‌റാഈല്‍-ഗസ്സ അതിര്‍ത്തിയില്‍ ഹമാസ് നടത്തിയതായി പറയപ്പെടുന്ന ബോംബ് സ്‌ഫോടനത്തിനു തിരിച്ചടിയായാണ് ആക്രമണം നടന്നത്.
ഇതില്‍ നാല് ഇസ്‌റാഈല്‍ സൈനികര്‍ക്കു പരുക്കേറ്റിരുന്നു. ആക്രമണത്തിനു ശക്തമായ തിരിച്ചടിയുണ്ടാകുമെന്ന് ഇതിനു പിറകെ ഇസ്‌റാഈല്‍ പ്രധാനമന്ത്രി ബിന്‍യാമീന്‍ നെതന്യാഹു മുന്നറിയിപ്പ് നല്‍കുകയും ചെയ്തു.
ഇതിനു ശേഷമാണ് ഹമാസ് കേന്ദ്രങ്ങള്‍ക്കുനേരെ ഇസ്‌റാഈല്‍ വ്യോമസേന റോക്കറ്റ് വിക്ഷേപിച്ചത്. തിരിച്ചടി മുന്നില്‍കണ്ട് പ്രദേശത്തുനിന്ന് ഹമാസ് ജനങ്ങളെ ഒഴിപ്പിച്ചിരുന്നതായി ഇസ്‌റാഈല്‍ വൃത്തങ്ങള്‍ പറഞ്ഞു.