പനജി: സെമി പ്രതീക്ഷകള്‍ക്ക് ജീവന്‍ നല്‍കാന്‍ ഇന്ന് കളത്തിലിറങ്ങിയ എഫ്. സി ഗോവക്ക് തിരിച്ചടി. ഡല്‍ഹി ഡൈനാമോസിനോട് സമനില വഴങ്ങിയതോടെയാണ് ഗോവയുടെ സെമി പ്രതീക്ഷകള്‍ക്ക് മങ്ങലേറ്റത്. ഇരു ടീമുകളും ഓരോ ഗോള്‍ വീതം അടിച്ച് സമനിലയില്‍ പിരിയുകയായിരുന്നു. കളിയുടെ 53-ാം മിനുട്ടിലാണ് ഗോവക്ക് വേണ്ടി ഹ്യൂഗോ ബൊമുസ് ആദ്യ ഗോള്‍ നേടിയത്.
വിജയം കൈപ്പിടിയിലൊതുക്കാന്‍ ഗോവ പ്രതിരോധം കാത്ത് കളിച്ചെങ്കിലും 81-ാം മിനിറ്റിള്‍ കാളു ഉച്ചെയുടെ മറുപടി ഗോള്‍ വന്നതോടെ മത്സരം സമനിലയിലായി. ലീഡ് നേടാന്‍ ഉണര്‍ന്നു കളിക്കുന്നതിനിടെ പലപ്പോഴും താരങ്ങള്‍ പരുക്കന്‍ കളികള്‍ പുറത്തെടുത്തു. ആദ്യ പകുതിയില്‍ തന്നെ നാലു തവണയാണ് റഫറി മഞ്ഞക്കാര്‍ഡ് പുറത്തെടുത്തത്. ഇരു ടീമുകളും ഓരോ പോയിന്റ് വീതം പങ്കിട്ടെടുത്തിനാല്‍ പോയിന്റ് പട്ടികയില്‍ മാറ്റമൊന്നുമുണ്ടായിട്ടില്ല. ഗോവയുടെ ഇന്നത്തെ സമനില ബ്ലാസ്‌റ്റേഴ്‌സിന് ഗുണകരമാകുമെന്നാണ് വിലയിരുത്തല്‍. ഡല്‍ഹിയുടെ ഹോം മത്സരത്തില്‍ 5-1നായിരുന്നു ഗോവ ഡല്‍ഹിയെ പരാജയപ്പെടുത്തിയത്. പോയിന്റ് പട്ടികയിലെ അവസാന സ്ഥാനത്ത് നിന്ന് കരകയറാനുള്ള ഡല്‍ഹിയുടെ മോഹങ്ങള്‍ക്ക് ഇന്നത്തെ സമനില തിരിച്ചടിയായി.
ഇന്ന് എട്ടിന് നടക്കുന്ന മത്സരത്തില്‍ മുംബൈ സിറ്റി എഫ്. സി നോര്‍ത്ത് ഈസ്റ്റ് യുണൈറ്റഡിനെ നേരിടും.