ന്യൂഡല്‍ഹി: വിദേശ സര്‍വകലാശാലകളില്‍ നിന്ന് മെഡിക്കല്‍ ബിരുദം നേടാന്‍ ശ്രമിക്കുന്നവരും നീറ്റ് യോഗ്യത നിര്‍ബന്ധമായും നേടിയിരിക്കണമെന്ന് കേന്ദ്ര ആരോഗ്യമന്ത്രാലയം. ഇതുസംബന്ധിച്ച നിര്‍ദേശം ഈ വര്‍ഷം മെയ് മുതല്‍ നിര്‍ബന്ധമാക്കുമന്നും മന്ത്രാലയം അറിയിച്ചു.
വിദേശ സര്‍വകലാശാലകളില്‍ മെഡിക്കല്‍ ബിരുദം നേടാന്‍ പോകുന്ന ഇന്ത്യന്‍ പൗരന്മാരും ഓവര്‍സീസ് സിറ്റിസണ്‍സ് ഓഫ് ഇന്ത്യ(ഒ.സി.ഐ) കാര്‍ഡുള്ള വിദ്യാര്‍ഥികളും സര്‍ക്കാരിന്റെ നീറ്റ് പരീക്ഷയില്‍ യോഗ്യത നേടണം. നിലവിലെ നടപടിക്രമങ്ങള്‍ അനുസരിച്ച് വിദേശ സര്‍വകലാശാലകളില്‍ പ്രവേശനം നേടിയവരെ ഈ നിര്‍ദേശത്തില്‍ നിന്ന് ഒഴിവാക്കിയിട്ടുണ്ട്. ഇവര്‍ മെഡിക്കല്‍ കൗണ്‍സില്‍ ഓഫ് ഇന്ത്യയില്‍ നിന്ന് യോഗ്യതാ സര്‍ട്ടിഫിക്കറ്റ് നേടിയ കാരണത്താലാണിത്. നേരത്തെ പ്രവേശനം നേടിയവരെയും സര്‍ക്കാരിന്റെ നീക്കം ബാധിക്കുമെന്ന ആശങ്കകള്‍ക്കിടയിലാണ് ആരോഗ്യമന്ത്രാലയം വ്യക്തത വരുത്തി രംഗത്തെത്തിയത്.