വാഷിങ്ടണ്‍: ഉ.കൊറിയയ്‌ക്കെതിരേ അമേരിക്ക പുതിയ ഉപരോധം ഏര്‍പ്പെടുത്തി. നേരത്തെ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് പ്രഖ്യാപിച്ചതു പ്രകാരം ട്രഷറി വകുപ്പാണ് ഇക്കാര്യം വെബ്‌സൈറ്റില്‍ പ്രസിദ്ധീകരിച്ച പ്രസ്താവനയിലൂടെ അറിയിച്ചത്. ഉ.കൊറിയയ്‌ക്കെതിരേ ഇതുവരെ ഏര്‍പ്പെടുത്തിയതില്‍ ഏറ്റവും ശക്തമായ ഉപരോധമാണിത്.
ഉ.കൊറിയയ്ക്കു സാമ്പത്തികമായ സഹായം നല്‍കുന്ന ഒരു പ്രമുഖ വ്യക്തി, 27 കമ്പനികള്‍, 28 കപ്പലുകള്‍ എന്നിവയ്ക്കാണ് ഉപരോധം ഏര്‍പ്പെടുത്തിയിരിക്കുന്നത്. യു.എന്‍ ഉപരോധത്തിനിടെയും കടല്‍മാര്‍ഗം എണ്ണയും കല്‍ക്കരിയും ഉ.കൊറിയയിലേക്കെത്തിയതായി അടുത്തിടെ റിപ്പോര്‍ട്ട് പുറത്തുവന്നിരുന്നു. ഇത്തരം സമുദ്ര കടത്തിനുള്ള എല്ലാ മാര്‍ഗങ്ങളും അടക്കുകയാണ് അമേരിക്ക ലക്ഷ്യമിടുന്നത്.
ഉപരോധം ശക്തമാക്കാന്‍ ഐക്യരാഷ്ട്രസഭയോടും അമേരിക്ക ആവശ്യപ്പെട്ടിട്ടുണ്ട്. കരിമ്പട്ടികയില്‍ ഉള്‍പ്പെടുത്തേണ്ട കമ്പനികളുടെ പേര് യു.എന്നിനു മുന്‍പില്‍ സമര്‍പ്പിക്കുകയും ചെയ്തിട്ടുണ്ട്.
ഉപരോധം ശക്തമാക്കിയതിനു പിന്നില്‍ പുതിയ പ്രകോപനങ്ങള്‍ ഒന്നുമില്ല. കടുത്ത വൈരികളായിരുന്ന ഇരുകൊറിയകളും ശൈത്യകാല ഒളിംപിക്‌സിന്റെ ഭാഗമായി പരസ്പരം അടുപ്പത്തിലായത് അമേരിക്കയ്ക്ക് അലോസരം സൃഷ്ടിച്ചിരുന്നു. ഇതിന്റെ പശ്ചാത്തലത്തില്‍ കൂടിയാകണം അമേരിക്കയുടെ നടപടിയെന്നും കരുതപ്പെടുന്നുണ്ട്.