മിലാന്‍: തുടര്‍ പരാജയങ്ങളുമായി നട്ടംതിരിഞ്ഞ ഇംഗ്ലീഷ് കരുത്തരായ ആഴ്‌സണല്‍ വിജയ വഴിയില്‍. വിജയ പരമ്പരകള്‍ തീര്‍ത്ത് മുന്നേറിയ എ.സി മിലാനെ അവരുടെ തട്ടകത്തില്‍ മറുപടിയില്ലാത്ത രണ്ട് ഗോളുകള്‍ക്ക് വീഴ്ത്തി ആഴ്‌സണല്‍ യൂറോപ്പ ലീഗ് ക്വാര്‍ട്ടര്‍ പ്രതീക്ഷകള്‍ സജീവമാക്കി.
പ്രീ ക്വാര്‍ട്ടര്‍ പോരാട്ടത്തിന്റെ ആദ്യ പാദത്തില്‍ മാഞ്ചസ്റ്റര്‍ യുനൈറ്റഡില്‍ നിന്ന് എത്തിയ മിഖിതാര്യന്‍ ആഴ്‌സണലിന് വേണ്ടി ആദ്യമായി വല ചലിപ്പിച്ചപ്പോള്‍ 15ാം മിനുട്ടില്‍ അവര്‍ മുന്നിലെത്തി. ഒന്നാം പകുതി തീരാന്‍ നിമിഷങ്ങള്‍ മാത്രമുള്ളപ്പോള്‍ ആരോണ്‍ റാംസി രണ്ടാം ഗോളും വലയിലാക്കി.
പിന്നീട് മിലാനെ ഗോളടിക്കാന്‍ അനുവദിക്കാതെ ആഴ്‌സണല്‍ വിജയം സ്വന്തമാക്കുകയായിരുന്നു. ജയത്തോടെ സ്വന്തം തട്ടകത്തില്‍ നടക്കുന്ന രണ്ടാം പാദ പോരാട്ടത്തിന് ആത്മവിശ്വാസത്തോടെ ഇറങ്ങാനുള്ള ഊര്‍ജം ഈ വിജയത്തിലൂടെ ഗണ്ണേഴ്‌സ് നേടുകയും ചെയ്തു.
മറ്റൊരു മത്സരത്തില്‍ സ്പാനിഷ് കരുത്തരായ അത്‌ലറ്റിക്കോ മാഡ്രിഡ് സ്വന്തം തട്ടകത്തില്‍ വിജയം സ്വന്തമാക്കി. ലോകോമോട്ടീവ് മോസ്‌ക്കോയെ മറുപടിയില്ലാത്ത മൂന്ന് ഗോളുകള്‍ക്ക് തകര്‍ത്താണ് അത്‌ലറ്റിക്കോ വിജയിച്ചത്. അതേസമയം ജര്‍മന്‍ കരുത്തരായ ബൊറൂസിയ ഡോര്‍ട്മുണ്ടിനെ അവരുടെ തട്ടകത്തില്‍ കയറി റെഡ് ബുള്‍ അട്ടിമറിച്ചു. ഒന്നിനെതിരേ രണ്ട് ഗോളുകള്‍ക്കാണ് റെഡ് ബുള്‍ വിജയിച്ചത്.
മറ്റ് മത്സരങ്ങളില്‍ ഒളിംപിക് ലിയോണ്‍ 1-0ത്തിന് സി.എസ്.കെ.എ മോസ്‌ക്കേയേയും ഒളിംപിക് മാഴ്‌സ 3-1ന് അത്‌ലറ്റിക്ക് ബില്‍ബാവോയേയും ലെയ്പ്‌സിഗ് 2-1ന് സെനിതിനേയും സ്‌പോര്‍ടിങ് സി.പി 2-0ത്തിന് വിക്ടോറിയ പ്ലാസനേയും പരാജയപ്പെടുത്തി. ലാസിയോ- ഡൈനാമോ കീവ് മത്സരം 2-2ന് സമനില.