വടകര: ആര്‍.എം.പി നേതാവായിരുന്ന ടി.പി ചന്ദ്രശേഖരന്‍ സി.പി.എം നശിച്ചുകാണാന്‍ ഒരിക്കലും ആഗ്രഹിക്കാതിരുന്ന നേതാവായിരുന്നുവെന്ന് സംസ്ഥാന സെക്രട്ടറി കോടിയേരി ബാലകൃഷ്ണന്‍. ഒഞ്ചിയത്തെ ഓര്‍ക്കാട്ടേരിയില്‍ സി.പി.എം രാഷ്ട്രീയ വിശദീകരണ യോഗത്തില്‍ സംസാരിക്കുകയായിരുന്നു അദ്ദേഹം. സി.പി.എം പുറത്താക്കിയപ്പോള്‍ മാത്രമാണ് ടി.പി പാര്‍ട്ടിക്കെതിരേ സംസാരിച്ചത്. അപ്പോഴും കോണ്‍ഗ്രസിനെയും യു.ഡി.എഫിനെയും ബി.ജെ.പിയെയും തുറന്ന് എതിര്‍ത്തയാളായിരുന്നു ചന്ദ്രശേഖരന്‍.
അന്നു സി.പി.എമ്മിനു വിപ്ലവം പോരെന്നു പറഞ്ഞാണ് അദ്ദേഹം ആര്‍.എം.പി സ്ഥാപിച്ചത്. എന്നാല്‍ അതിപ്പോള്‍ രമയുടെ മാത്രം പാര്‍ട്ടിയായി മാറിയെന്നും കോടിയേരി കുറ്റപ്പെടുത്തി. ഇതാദ്യമായാണു സി.പി.എം സംസ്ഥാന സെക്രട്ടറി ടി.പിയെ പുകഴ്ത്തി സംസാരിക്കുന്നത്. ചന്ദ്രശേഖരന്‍ കൊല്ലപ്പെട്ടതിനു പിന്നാലെ സി.പി.എം ഒഞ്ചിയത്ത് നടത്തിയ വിശദീകരണ യോഗത്തില്‍ കുലംകുത്തി തന്നെയെന്നായിരുന്നു അന്നത്തെ സംസ്ഥാന സെക്രട്ടറി പിണറായി വിജയന്റെ പ്രതികരണം. സി.പി.എം-ആര്‍.എം.പി സംഘര്‍ഷത്തിന്റെ പശ്ചാത്തലത്തിലായിരുന്നു ഇന്നലത്തെ സി.പി.എം വിശദീകരണ യോഗം.