ക്രിസ്റ്റ്യാനോ റൊണാള്‍ഡോയ്ക്ക് പിന്നാലെ ചാംപ്യന്‍സ് ലീഗില്‍ 100 ഗോളുകളെന്ന നേട്ടം സ്വന്തമാക്കി ലയണല്‍ മെസ്സി. ഏറ്റവും വേഗത്തില്‍ 100 ഗോളുകള്‍ തികയ്ക്കുന്ന ആദ്യ താരമായും മെസ്സി ഇതോടെ മാറി. 123ാം ചാംപ്യന്‍സ് ലീഗ് പോരാട്ടത്തിലാണ് മെസ്സി നാഴികക്കല്ല് പിന്നിട്ടത്. ക്രിസ്റ്റ്യാനോ 100ാം ഗോള്‍ തികച്ചത് 144ാം മത്സരത്തിലായിരുന്നു. 2005 നവംബര്‍ രണ്ടിന് പനതിനായികോസിനെതിരേയാണ് മെസ്സി ആദ്യമായി ചാംപ്യന്‍സ് ലീഗ് ഗോള്‍ സ്വന്തമാക്കിയത്. 2012 ഏപ്രില്‍ മൂന്നിന് എ.സി മിലാനെതിരേയാണ് 50ാം ഗോള്‍ തികച്ചത്. ചെല്‍സിക്കെതിരായ പ്രീ ക്വാര്‍ട്ടറിലെ രണ്ടാം പാദത്തില്‍ രണ്ടാം ഗോളിലൂടെ ഇപ്പോള്‍ ശതകവും സൂപ്പര്‍ താരം പിന്നിട്ടു. ചെല്‍സിക്കെതിരേ ആദ്യ ഗോള്‍ മത്സരം തുടങ്ങി 128ാം സെക്കന്‍ഡില്‍ തന്നെ വലയിലാക്കിയാണ് മെസ്സി 99ലേക്ക് കടന്നത്. ബാഴ്‌സയ്ക്കായി താരം നേടുന്ന ഏറ്റവും വേഗതയേറിയ ഗോളായും ഇത് മാറി.