നീലേശ്വരം: ട്രാന്‍സ്‌ഫോര്‍മര്‍ സ്ഥാപിക്കാത്തതിനാല്‍ കിനാനൂര്‍-കരിന്തളം പഞ്ചായത്തിലെ 19 ജലനിധി പദ്ധതികള്‍ പ്രതിസന്ധിയിലായി. ഇവയ്ക്കാവശ്യമായ വൈദ്യുത കണക്ഷന്‍ ഇല്ലാത്തതു കൊണ്ടു തന്നെ പദ്ധതികള്‍ പ്രവര്‍ത്തനക്ഷമമാക്കാന്‍ കഴിഞ്ഞില്ല.
ജലക്ഷാമം നേരിടുന്ന കോളംകുളം, പുലയനടുക്കം, ചെറുവ, കൂവാറ്റി, ചോയ്യംകോട് എന്നീ പ്രദേശങ്ങളും ഇതില്‍പ്പെടുന്നു. കെ.എസ്.ഇ.ബിയുടെ റിപ്പോര്‍ട്ടിന്റെ അടിസ്ഥാനത്തിലാണ് ട്രാന്‍സ്‌ഫോര്‍മറിനായുള്ള പ്രൊജക്ട് തയാറാക്കുന്നത്.
എന്നാല്‍ ഭൂരിഭാഗം ഇടങ്ങളിലും ഇതിന്റെ പണി പൂര്‍ത്തിയായിട്ടില്ല. കെ.എസ്.ഇ.ബി ചുമതലപ്പെടുത്തിയ കരാറുകാരാണ് ഇതു ചെയ്യേണ്ടത്. പഞ്ചായത്ത് ജലനിധി പദ്ധതിക്കായി 1.33 കോടി രൂപ ട്രാന്‍സ്‌ഫോര്‍മറിനു കെ.എസ്.ഇ.ബിയില്‍ അടച്ചിരുന്നു.
ഓരോ ഗുണഭോക്താവില്‍ നിന്നും ശരാശരി നാലായിരം രൂപ വീതം വിഹിതമായി ശേഖരിക്കുകയും ചെയ്തിരുന്നു. 53 സമിതികളിലായി 2700 ഓളം കുടുംബങ്ങള്‍ക്കാണ് ഇതിന്റെ ഗുണം ലഭിക്കുക. ഇതാണ് കെ.എസ്.ഇ.ബി അധികൃതരുടെ അനാസ്ഥകാരണം എങ്ങുമെത്താതെ കിടക്കുന്നത്.
അതേ സമയം പദ്ധതികളുടെ പണി പൂര്‍ത്തിയാകാത്തതാണ് ട്രാന്‍സ്‌ഫോര്‍മര്‍ സ്ഥാപിക്കാന്‍ വൈകുന്നതിനു കാരണമെന്നാണ് കെ.എസ്.ഇ.ബി അധികൃതരുടെ വിശദീകരണം.
പദ്ധതികള്‍ പൂര്‍ത്തീകരിച്ച് അപേക്ഷ നല്‍കിയാല്‍ ഉടന്‍ ട്രാന്‍സ്‌ഫോര്‍മര്‍ സ്ഥാപിക്കുന്നതിനുള്ള നടപടി സ്വീകരിക്കുമെന്നും അവര്‍ പറഞ്ഞു.