കോഴിക്കോട്: മതപ്രസംഗത്തിനിടെ പെണ്‍കുട്ടികളെ ആക്ഷേപിച്ച് സംസാരിച്ചുവെന്ന പരാതിയില്‍ ഫാറൂഖ് ട്രെയ്‌നിങ് കോളജ് അധ്യാപകനെതിരേ കേസെടുത്ത പൊലിസ് നടപടിയെ ന്യായീകരിച്ച് ഡി.വൈ.എഫ്.ഐ അഖിലേന്ത്യാ പ്രസിഡന്റ് പി.എ മുഹമ്മദ് റിയാസ്. കോഴിക്കേട് പ്രസ് ക്ലബില്‍ വാര്‍ത്താസമ്മേളനത്തിനിടെയാണ് അദ്ദേഹം പൊലിസിന്റെ നടപടിയെ ന്യായീകരിച്ചത്.
ഫാറൂഖ് കോളജിനെ തകര്‍ക്കാനുള്ള ശ്രമമാണെന്ന് പ്രചരിപ്പിക്കുന്നവര്‍ സംഘ്പരിവാറിനെ സഹായിക്കുകയാണ്. പൊലിസ് അന്വേഷണം നടത്തിയാണ് അധ്യാപകനെതിരേ കേസ് രജിസ്റ്റര്‍ ചെയ്തത്. ഇത്തരക്കാരെ തള്ളിപ്പറയാന്‍ മതസംഘടനകള്‍ തയാറാകണം. ഫാറൂഖ് കോളജ് മതസാമൂഹിക രംഗത്ത് നല്‍കിയ സംഭാവനകള്‍ ഓര്‍ക്കുന്നുവെന്നും കോളജിന്റെ സംരക്ഷണ കാര്യത്തില്‍ ഡി.വൈ.എഫ്.ഐ മുന്‍പന്തിയിലുണ്ടാകുമെന്നും അദ്ദേഹം പറഞ്ഞു. കഴിഞ്ഞദിവസമാണ് ഫാറൂഖ് ട്രെയ്‌നിങ് കോളജ് അധ്യാപകനെതിരേ കൊടുവള്ളി പൊലിസ് കേസെടുത്തത്. ഇതിനെതിരേ വ്യാപക പ്രതിഷേധം ഉയരുന്നതിനിടെയാണ് ഡി.വൈ.എഫ്.ഐ പൊലിസ് നടപടിയെ ന്യായീകരിച്ച് രംഗത്തെത്തിയത്.