കൊച്ചി: 'സുഡാനി ഫ്രം നൈജീരിയ'യിലെ രംഗങ്ങള്‍ മൊബൈല്‍ ഫോണിലും മറ്റും പകര്‍ത്തി സോഷ്യല്‍ മീഡിയയില്‍ അപ്‌ലോഡ് ചെയ്യരുതേ എന്ന അപേക്ഷയുമായി ചലച്ചിത്രത്തിന്റെ സംവിധായകന്‍ സക്കറിയ. സിനിമയോട് തോന്നിയ ഇഷ്ടം കൊണ്ടാകാം, ചിലര്‍ തിയറ്ററില്‍നിന്നു പകര്‍ത്തിയ ദൃശ്യങ്ങള്‍ സാമൂഹ്യ മാധ്യമങ്ങളില്‍ ഇടുന്നുണ്ട്. ചിത്രത്തിലെ സുപ്രധാന സീനുകള്‍ പലതും ഇത്തരത്തില്‍ പ്രചരിക്കുന്നുണ്ട്. എന്നാല്‍, ഒരുപാട് പേരുടെ സ്വപ്നവും ജീവിതവുമാണ് ഈ സിനിമയുടെ വിജയം. അത് തകര്‍ക്കരുതേയെന്നും അദ്ദേഹം കൊച്ചിയില്‍ വാര്‍ത്താസമ്മേളനത്തില്‍ പറഞ്ഞു.
നായകന്‍ സാമുവേല്‍ അബിയോള റോബിന്‍സണ്‍, നിര്‍മാതാവ് ഷൈജു ഖാലിദ്, തിരക്കഥയില്‍ പങ്കാളിയായ മുഹ്‌സിന്‍ പരാരി എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.