ഷൊര്‍ണൂര്‍: ബസുകളുടെ എയര്‍ഹോണ്‍ യാത്രക്കാര്‍ക്ക് ദുരിതമാകുന്നു. ഷൊര്‍ണൂര്‍ ബസ് സ്റ്റാന്റില്‍ ചില സ്വകാര്യ ബസുകളുടെ ഡ്രൈവര്‍മാര്‍ കാതടപ്പിക്കുന്ന എയര്‍ഹോണ്‍ ആണ് ഉപയോഗിക്കുന്നത്. ഇത് യാത്രക്കാര്‍ക്കും വിദ്യാര്‍ഥികള്‍ക്കും ഒരു പോലെ ദുരിതമാവുകയാണ്. ഹോണടിച്ചുകഴിഞ്ഞാല്‍ ബസ്റ്റാന്റില്‍ കാത്തുനില്‍ക്കുന്ന യാത്രക്കാരും വിദ്യാര്‍ഥികളും ചെവിപൊത്തിനില്‍ക്കുന്ന അവസ്ഥയാണ് ഉള്ളത്. സ്റ്റാന്റുകളിലും, ടൗണുകളിലും എയര്‍ഹോണ്‍ മുഴക്കല്‍ നിരോധിച്ചിട്ടുണ്ടെങ്കിലും ഡ്രൈവര്‍മാര്‍ ഇതൊന്നും വകവെക്കാറില്ല. സ്റ്റാന്റിലേക്ക് പ്രവേശിക്കുന്ന ബസുകള്‍ അമിതവേഗതയില്‍ എത്തുന്നതും പതിവാണ്. ഇതൊന്നും ശ്രദ്ധിക്കാന്‍ സ്റ്റാന്റില്‍ പൊലിസുകരോ മറ്റു നിയമപാലകരോ ആരേയും തന്നെ കാണുന്നില്ല. കഴിഞ്ഞ ദിവസം എയര്‍ഹോണടിച്ച ഒരു ബസ് ജീവനക്കാരെ നാട്ടുകാര്‍ താക്കീത് ചെയ്ത് വിട്ടു.