ബാങ്കോക്ക്: തായ്‌ലാന്റിലെ കടുവാ ക്ഷേത്രത്തിലെ സന്യാസി പിടിയില്‍. വിവാദ ക്ഷേത്രത്തില്‍നിന്ന് കടുവയുടെ തോലും പല്ലുകളുമായി കടക്കാന്‍ ശ്രമിക്കവേയാണ് ഇന്നലെയാണ് ഇയാള്‍ പിടിയിലായത്. കടുവയുടെ തോലും പല്ലുകളുമായി നിര്‍ത്തിയിട്ടിരുന്ന കാറാണ് ഇന്നലെ പൊലിസ് പിടിച്ചത്. സന്യാസി രക്ഷപ്പെടാനായി ഒരുക്കിനിര്‍ത്തിയിരുന്നതാണ് ഈ വാഹനമെന്ന് അധികൃതര്‍ പറയുന്നു. തുടര്‍ന്ന് നടത്തിയ  പരിശോധനയില്‍ സന്യാസിയുടെ ക്വാര്‍ട്ടേഴ്‌സില്‍നിന്നു കൂടുതല്‍ പല്ലുകളും മറ്റും കണ്ടെടുത്തിട്ടുണ്ട്. ക്ഷേത്രത്തിലെ ഫ്രീസറില്‍ 40 കടുവക്കുട്ടികളുടെയും കരടി ഉള്‍പ്പെടെയുള്ള വന്യമൃഗങ്ങളുടെയും ജഡാവശിഷ്ടങ്ങളും കണ്ടെത്തിയതിനെ തുടര്‍ന്നാണ് വ്യാപക പരിശോധന ആരംഭിച്ചത്. പടിഞ്ഞാറന്‍ ബാങ്കോക്കിലെ കാഞ്ചനബുരി പ്രവിശ്യയിലെ വിനോദസഞ്ചാര കേന്ദ്രത്തിലാണ് കടുവാക്ഷേത്രമെന്ന് അറിയപ്പെട്ടിരുന്ന ബുദ്ധക്ഷേത്രം പ്രവര്‍ത്തിച്ചിരുന്നത്.