മട്ടാഞ്ചേരി: നഗരസഭ മട്ടാഞ്ചേരി മേഖല ഓഫീസിന് കീഴിലുള്ള ആരോഗ്യ വിഭാഗം മൂന്ന്,നാല് സര്‍ക്കിള്‍ പരിധിയിലെ ഹോട്ടലുകളില്‍ ഹെല്‍ത്ത് സ്‌ക്വാഡ് നടത്തിയ പരിശോധനയില്‍ നിരവധി പഴകിയ ഭക്ഷണ സാധനങ്ങള്‍ പിടിച്ചെടുത്തു.
ഇന്നലെ രാവിലെ ഏഴ് മണിയോടെയാണ് ആരോഗ്യ വിഭാഗം അധികൃതര്‍ പരിശോധന നടത്തിയത് മട്ടാഞ്ചേരി ജെട്ടി പരിസരത്തെ ന്യൂ ഇന്ത്യ ഹോട്ടല്‍,സിമെന്‍,അമ്മായിമുക്കില്‍ പ്രവര്‍ത്തിക്കുന്ന ഹോട്ടല്‍ നജ്‌ന,പാലസ് റോഡില്‍ ഹോട്ടല്‍ അഥര്‍വ്വ, ഹോട്ടല്‍ അറഫ എന്നിവടങ്ങളില്‍ നടത്തിയ പരിശോധനയിലാണ് മനുഷ്യ ശരീരത്തിന് ഹാനീകരമായിട്ടുള്ളതും പഴകിയതുമായ ഭക്ഷണ പദാര്‍ത്ഥങ്ങള്‍ പിടിച്ചെടുത്തത്.
ഇതില്‍ വൃത്തി ഹീനമായ അന്തരീക്ഷത്തില്‍ പ്രവര്‍ത്തിച്ചിരുന്ന ഹോട്ടല്‍ ന്യു ഇന്ത്യ,നജ്‌ന എന്നിവ താല്‍ക്കാലികമായി അടച്ച് പൂട്ടി.ഇവര്‍ക്ക് ആരോഗ്യ വിഭാഗം നോട്ടീസ് നല്‍കി.ഇനിയും നിരവധി സ്ഥാപനങ്ങളില്‍ പരിശോധന നടത്തേണ്ടതായിട്ടുണ്ട്.
പല ഹോട്ടലുകളിലും തലേ ദിവസം ബാക്കി വരുന്ന ഭക്ഷണം പിറ്റേ ദിവസം ചൂടാക്കി നല്‍കുകയാണ് പതിവ്.
പൊറോട്ട പൊടി കുഴക്കുന്ന യന്ത്രത്തില്‍ എലിക്കുഞ്ഞുങ്ങളെ കണ്ട സംഭവം മട്ടാഞ്ചേരി ചിറളായി കടവിലെ ഒരു ഹോട്ടലില്‍ ഉണ്ടായി.ഹെല്‍ത്ത് ഇന്‍സ്‌പെക്ടര്‍മാരായ എന്‍.കെ.അജിത്ത് കുമാര്‍,കെ.പി.സുബൈര്‍,ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ എച്ച്.അനില്‍കുമാര്‍,വി.വി.സുരേഷ് എന്നിവരുടെ നേതൃത്വത്തിലായിരുന്നു പരിശോധന.ആരോഗ്യ ജാഗ്രത കാമ്പയിന്റെ ഭാഗമായി വരും ദിവസങ്ങളിലും പരിശോധന തുടരുമെന്ന് അധികൃതര്‍ അറിയിച്ചു.