കൊച്ചി: കരിയറില്‍ ഒരിക്കലെങ്കിലും കേരള ബ്ലാസ്റ്റേഴ്‌സ് ജേഴ്‌സിയില്‍ കളിക്കണമെന്ന ഇന്ത്യന്‍ പ്രതിരോധ താരവും മലയാളിയുമായ അനസ് എടത്തൊടികയുടെ ആഗ്രഹം പൂവണിഞ്ഞു. ഇന്ത്യന്‍ സൂപ്പര്‍ ലീഗിന്റെ അടുത്ത സീസണില്‍ അനസ് കേരളത്തിനായി കളത്തിലിറങ്ങും. നിലവില്‍ ജംഷഡ്പൂര്‍ എഫ്.സി താരമായ അനസുമായി കേരള ടീം രണ്ട് വര്‍ഷത്തെ കരാറിലെത്തി. അടുത്ത സീസണില്‍ കൂടുതല്‍ മലയാളി താരങ്ങള്‍ക്ക് അവസരം നല്‍കുക ലക്ഷ്യമിട്ടാണ് അനസിനെ ബ്ലാസ്റ്റേഴ്‌സ് സ്വന്തം പാളയത്തിലെത്തിച്ചത്. അനസിന് ഏതാണ്ട് ഒന്നരക്കോടി രൂപ വാര്‍ഷിക പ്രതിഫലമായി നല്‍കുമെന്ന സ്ഥിരീകരിക്കാത്ത റിപ്പോര്‍ട്ടുകള്‍ പുറത്തു വരുന്നുണ്ട്. താരത്തിന്റെ പ്രതിഫലം സംബന്ധിച്ച് ടീമിന്റെ ഔദ്യോഗിക വിശദീകരണങ്ങളൊന്നും പുറത്ത് വന്നിട്ടില്ല. ഇന്ത്യന്‍ ടീമിലെ പ്രതിരോധ കോട്ടയുടെ നെടുംതൂണുകളിലൊന്നാണ് അനസ്. കേരള ബ്ലാസ്റ്റേഴ്‌സ് നായകനും ഇന്ത്യന്‍ ടീമിലെ സഹ താരവുമായ സന്ദേശ് ജിങ്കനുമൊത്ത് ദേശീയ ടീമില്‍ മികച്ച പ്രതിരോധ കൂട്ടുകെട്ടാണ് ഇരുവരും ചേര്‍ത്ത് കെട്ടിപ്പടുക്കിയിട്ടുള്ളത്. ഈ മികവിന്റെ തുടര്‍ച്ച അടുത്ത സീസണില്‍ കേരള ബ്ലാസ്റ്റേഴ്‌സിലും മലയാളി ഫുട്‌ബോള്‍ പ്രേമികള്‍ക്ക് കാണാം.
നേരത്തെ ഐ.എസ്.എല്ലിലെ രണ്ട് സീസണുകളില്‍ അനസ് ഡല്‍ഹി ഡൈനാമോസിനായാണ് കളത്തിലിറങ്ങിയത്. അനസിനെ കൂടാതെ മുംബൈ സിറ്റി താരം എം.പി സക്കീര്‍, നോര്‍ത്ത്ഈസ്റ്റ് യുനൈറ്റഡ് താരം അബ്ദുല്‍ ഹക്ക് എന്നീ മലയാളി താരങ്ങളേയും അടുത്ത സീസണ്‍ ലക്ഷ്യമിട്ട് ബ്ലാസ്റ്റേഴ്‌സ് സ്വന്തമാക്കിയിട്ടുണ്ട്. ഇന്ത്യന്‍ സൂപ്പര്‍ കപ്പ് പോരാട്ടത്തിനായി ജംഷഡ്പൂരിനൊപ്പമുള്ള അനസ് ഇതിന് ശേഷം ബ്ലാസ്റ്റേഴ്‌സ് ക്യാംപിലെത്തും.