കൊല്‍ക്കത്ത: കടുത്ത സമ്മര്‍ദ്ദത്തെയും മിസോറമിന്റെ വെല്ലുവിളികളെയും അതിജീവിച്ച് കേരളത്തിന്റെ യുവ താരങ്ങള്‍ നേടിയത് ഗംഭീര വിജയമെന്ന് മുന്‍ ഇന്ത്യന്‍ ഫുട്‌ബോള്‍ ക്യാപ്റ്റന്‍ ജോപോള്‍ അഞ്ചേരി. സന്തോഷ് ട്രോഫി സെമി പോരാട്ടം കാണാനെത്തിയതായിരുന്നു ജോപോള്‍. ഇരു ടീമുകളും മികച്ച കളിയാണ് നടത്തിയത്. മിസോറമിനെ കീഴടക്കുക ഒട്ടും അനായാസമായിരുന്നില്ല കേരളത്തിന്. മികച്ച രീതിയില്‍ തന്നെ കേരളം പോരാടി. അതിനുള്ള പ്രതിഫലമാണ് ഫൈനലിലേക്കുള്ള ടിക്കറ്റ്. പ്രത്യാക്രമണത്തിലൂടെ ഗോള്‍ നേടാനുള്ള തന്ത്രമാണ് ജയിച്ചത്.
കാറ്റ് ആദ്യ പകുതിയില്‍ മിസോറമിന് അനുകൂലമായിരുന്നു. എന്നാല്‍, രണ്ടാം പകുതിയില്‍ കാറ്റിന്റെ ആനുകൂല്യവും കേരളത്തിന് ഒപ്പമായി. മിസോറമിനെ അവരുടെ ശൈലിയില്‍ തന്നെ നേരിട്ടതാണ് വിജയത്തിന് വഴിയൊരുക്കിയത്. ഈ ടീമിനെയും പരിശീലകന്‍ സതീവന്‍ ബാലനെയും അഭിനന്ദിച്ച ജോപോള്‍ ഫൈനലില്‍ ടീമിന് വിജയാശംസകളും നേര്‍ന്നാണ് മടങ്ങിയത്.