കൊയിലാണ്ടി: നൂറിലധികം കേസുകളില്‍ പ്രതിയായ കുപ്രസിദ്ധ മോഷ്ടാവ് പൊലിസ് പിടിയിലായി. തലശ്ശേരി ജൂബിലി റോഡ് ആഷിയാനില്‍ സിദ്ദീഖാണ് അറസ്റ്റിലായത്.
കഴിഞ്ഞ 28നു കൊയിലാണ്ടി മാരാമുറ്റം തെരുവി മഹാഗണപതി ക്ഷേത്രത്തിലെ ഭണ്ഡാരം കുത്തിത്തുറന്ന് മോഷണം നടത്തിയ കേസിലാണു പ്രതിയെ പിടികൂടിയത്. ഈമാസം 14നു മാനന്തവാടി ജയിലില്‍ നിന്നിറങ്ങിയ പ്രതി തലശ്ശേരിയിലെ വലിയമുടാവില്‍ ഗവ. സ്‌കൂളില്‍ നിന്നു ലാപ്‌ടോപും മറ്റും മോഷണം നടത്തിയ കേസിലും പ്രതിയാണ്. മോഷണം നടത്തുന്ന സ്ഥലത്ത് മലമൂത്ര വിസര്‍ജനം നടത്തുന്നത് ഇയാളുടെ രീതിയാണ്. മാരാമുറ്റം തെരു ക്ഷേത്രകമ്മിറ്റി അംഗങ്ങളായ വിജിത്ത്, ലതീഷ്, ബിജീഷ് എന്നിവരുടെ സഹായത്തോടെയാണു പ്രതിയെ പൊലിസ് പിടികൂടിയത്. സി.ഐ ഉണ്ണികൃഷ്ണന്റെ നേതൃത്വത്തിലുള്ള അന്വേഷണ സംഘത്തില്‍ എസ്.ഐ ബിജു ഏബ്രഹാം, ജൂനിയര്‍ എസ്.ഐ വിജേഷ്, സീനിയര്‍ ബി.പി.ഒ കെ.പി ഗിരീഷ്, ഒ.കെ സുരേഷ് എന്നിവരും ഉണ്ടായിരുന്നു.