തിരുവനന്തപുരം: അടുത്ത അധ്യയനവര്‍ഷം മുതല്‍ സ്‌കൂളുകളിലെ പ്രവൃത്തിദിനങ്ങള്‍ വര്‍ധിപ്പിക്കാന്‍ വിദ്യാഭ്യാസവകുപ്പ് ഒരുങ്ങുന്നു. കുട്ടികള്‍ക്ക് പാഠ്യപദ്ധതി നിര്‍ദേശിക്കുന്ന പൂര്‍ണ പഠനസമയം ഉറപ്പുവരുത്താനാണ് സര്‍ക്കാര്‍ തീരുമാനം. നിലവിലെ അവധിദിനങ്ങള്‍ വെട്ടിച്ചുരുക്കിയാണ് പ്രവൃത്തിദിനങ്ങള്‍ വര്‍ധിപ്പിക്കുന്നത്. സാധ്യായ ദിനങ്ങളുടെ എണ്ണം വര്‍ധിപ്പിക്കാന്‍ എസ്.സി.ഇ.ആര്‍.ടി ഡയറക്ടര്‍ അധ്യക്ഷനായ സമിതിയെ സര്‍ക്കാര്‍ നിയോഗിച്ചു. 200 പ്രവൃത്തിദിനമെങ്കിലും കുട്ടികള്‍ക്ക് ഒരുവര്‍ഷം ലഭിക്കണമെന്നാണ് വിദ്യാഭ്യാസ അവകാശ നിയമം പറയുന്നത്. എന്നാല്‍, നൂറ്റിയെഴുപതില്‍ താഴെ ദിവസങ്ങളേ ഇപ്പോള്‍ ലഭിക്കുന്നുള്ളൂ.
ഈ കുറവ് പരിഹരിക്കാന്‍ നിലവില്‍ അവധിദിനങ്ങളായി പരിഗണിക്കുന്ന ഓഗസ്റ്റ് 15, ജനുവരി 26 തുടങ്ങിയ ദേശീയ ആഘോഷദിനങ്ങള്‍ പ്രവൃത്തിദിനങ്ങളാക്കാന്‍ വിദ്യാഭ്യാസ വകുപ്പ് ആലോചിക്കുകയാണ്. കൂടാതെ മഹാന്‍മാരുടെ അനുസ്മരണാര്‍ഥമുള്ള അവധികളും പ്രവൃത്തിദിനമാക്കും. മന്നം ജയന്തി, ശ്രീനാരായണ ജയന്തി, അംബേദ്കര്‍ ജയന്തി തുടങ്ങി അവധിദിനങ്ങളും സാധ്യായദിനങ്ങളാക്കാനാണ് ആലോചന.
നിലവില്‍ ഈ ദിനങ്ങള്‍ അവധിയായതിനാല്‍ മാഹാന്‍മാരെക്കുറിച്ച് പുതുതലമുറ അറിയാതെ പോകുന്നുവെന്നാണ് അധികൃതരുടെ വാദം. ഇവ സാധ്യായ ദിനങ്ങളാക്കിയാല്‍ വൈവിധ്യമുള്ള പ്രവര്‍ത്തനങ്ങളിലൂടെ മഹാന്‍മാരെക്കുറിച്ചുള്ള അറിവ് കുട്ടികള്‍ക്ക് പകര്‍ന്നുനല്‍കാമെന്നും അധികൃതര്‍ ന്യായീകരിക്കുന്നു. മതസാമുദായിക നേതാക്കളെ ബോധ്യപ്പെടുത്തി നിലവിലുള്ള ഒഴിവുദിനങ്ങള്‍ സാധ്യായ ദിനങ്ങളാക്കാമെന്നാണ് സര്‍ക്കാര്‍ കരുതുന്നത്. കൂടാതെ മേളകള്‍ അവധിക്കാലത്ത് നടത്തുന്നകാര്യവും സര്‍ക്കാര്‍ ആലോചിക്കുന്നുണ്ട്. അതേസമയം, അവധിദിനങ്ങള്‍ വെട്ടിച്ചുരുക്കാനുള്ള സര്‍ക്കാര്‍ നീക്കത്തിനെതിരേ കടുത്ത വിമര്‍ശനമുയരാന്‍ സാധ്യതയുണ്ട്.