റിയാദ്: സഊദിയില്‍ കേസിലകപ്പെട്ടു ജയില്‍ ശിക്ഷ അനുഭവിച്ചു വരുന്ന മലയാളി ആശുപ്രത്രിയില്‍ മരിച്ചു. പട്ടാമ്പി നെടുങ്ങോട്ടൂര്‍ ചെറിയങ്ങാട്ടില്‍ സൈതലവി (42) ഇന്നലെ ജിദ്ദ കിംഗ് ഫഹദ് ആശുപത്രിയില്‍ മരിച്ചത്.

ഷറഫിയയില്‍ വെച്ച് മതകാര്യ പൊലിസിന്റെ പിടിയിലായ ഇദ്ദേഹം ആറര വര്‍ഷമായി ജയിലില്‍ കഴിയുകയായിരുന്നു.

കേസില്‍ ഇദ്ദേഹത്തെ വധശിക്ഷക്ക് വിധിച്ചിരുന്നെങ്കിലും അപ്പീല്‍ കോടതി ഇത് റദ്ദ് ചെയ്തു മൂന്ന് വര്‍ഷം തടവ് ശിക്ഷയാക്കി മാറ്റിയിരുന്നു.

ശിക്ഷാ കാലാവധി കഴിഞ്ഞു നാട്ടിലേക്ക് മടങ്ങാനുള്ള നടപടിക്രമങ്ങള്‍ പൂര്‍ത്തിയായി വരുന്നതിനിടെയാണ് മരണം നടന്നതെന്നാണ് വിവരം.

ടിബി രോഗബാധയെ തുടര്‍ന്ന് ഇദ്ദേഹത്തെ ആശുപത്രിയില്‍ പ്രവേശിപ്പിക്കുകയായിരുന്നു. മൂന്നു വര്‍ഷത്തെ സഊദി ജീവിതത്തിനു ശേഷം നാട്ടിലേക്ക് പോകാനുള്ള ഒരുക്കത്തിനിടെയാണ് പൊലിസ് പിടിയിലാകുന്നത്.

ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം നാട്ടില്‍ കൊണ്ട് പോകാനുള്ള തയ്യാറെടുപ്പിലാണ് അധികൃതര്‍.