വാഷിങ്ടണ്‍: യു.എസ്-ചൈന വ്യാപാരയുദ്ധം കൂടുതല്‍ രൂക്ഷതയിലേക്ക്. ചൈനീസ് ഉല്‍പന്നങ്ങള്‍ക്കെതിരേ 100 ബില്യന്‍ ഡോളറിന്റെ ഇറക്കുമതി ചുങ്കം ചുമത്താനുള്ള സാധ്യതകള്‍ പരിശോധിക്കാന്‍ പ്രസിഡന്റ് ഡൊണാള്‍ഡ് ട്രംപ് അധികൃതരോട് ആവശ്യപ്പെട്ടു. ചൈനീസ് ഉല്‍പന്നങ്ങള്‍ക്ക് 50 ബില്യന്‍ ഡോളറിന്റെ ഇറക്കുമതി ചുങ്കം ഏര്‍പ്പെടുത്തിയതിന് പിന്നാലെയാണ് ഈ നീക്കം.
എന്നാല്‍ തങ്ങളുടെ താല്‍പര്യം നിലനിര്‍ത്താന്‍ എന്ത് നടപടിയും സ്വീകരിക്കുമെന്ന് ചൈന പ്രതികരിച്ചു. 106 യു.എസ് ഉല്‍പന്നങ്ങള്‍ക്ക് ഇറക്കുമതി ചുങ്കം ഏര്‍പ്പെടുത്തുമെന്ന് ചൈന പ്രഖ്യാപിച്ചതിന് പിന്നാലെയാണ് യു.എസിന്റെ പുതിയ തീരുമാനം.
ചൈനയും യു.എസും ലോകത്തിന്റെ രണ്ട് ശക്തികളാണെന്നും പരസ്പരം ബഹുമാനത്തോടെയും തുല്യതയോടെയും പെരുമാറണമെന്നും ചൈനീസ് വിദേശകാര്യമന്ത്രി വാങ് യി പറഞ്ഞു. തങ്ങള്‍ക്കെതിരേ ഉപരോധം ഏര്‍പ്പെടുത്തുന്നത് യു.എസിന്റെ തെറ്റായ നീക്കമാണെന്ന് അദ്ദേഹം പറഞ്ഞു.
ആര്‍ക്കെങ്കിലുമെതിരേ പോരാടേണ്ട ആവശ്യം തങ്ങള്‍ക്കില്ലെന്നും എന്നാല്‍ വ്യാപാരയുദ്ധം നടത്തുന്നതില്‍ തങ്ങള്‍ക്ക് ഭയമില്ലെന്നും ചൈനീസ് വാണിജ്യ മന്ത്രാലയ വക്താവ് ജിയോ ഫെങ് യു.എസിന്റെ പുതിയ നീക്കത്തോട് പ്രതികരിച്ചു.
കഴിഞ്ഞ വര്‍ഷം യു.എസിലേക്ക് ചൈന 500 ബില്യന്‍ ഡോളറിന്റെ ഇറക്കുമതിയാണ് നടത്തിയത്. പുതിയ ഇറക്കുമതി ചുങ്കം ഏര്‍പ്പെടുത്തിയാല്‍ അമേരിക്കന്‍ വിപണിയില്‍ വന്‍ തിരിച്ചടിയാണുണ്ടാവുക.