കെ.എസ്.യുവിന്റെ നേതൃത്വത്തില്‍ കൊല്ലത്ത് ട്രെയ്ന്‍ തടഞ്ഞു

കൊല്ലം: നരേന്ദ്രമോദിയുടെ ഭരണത്തില്‍ സംഘപരിവാര്‍ നേതൃത്വത്തില്‍ നടക്കുന്ന ഫാസിസ്റ്റ് പ്രവര്‍ത്തനത്തിന്റെ അവസാനത്തെ ഇരയാണ് കാശ്മീരില്‍ ക്രൂരമായി കൊലചെയ്യപ്പെട്ട ബാലികയെന്ന് കെ.എസ്.യു ആരോപിച്ചു.
സംഘപരിവാര്‍ നേതൃത്വത്തില്‍ കേന്ദ്ര ഭരണത്തിന്റെ ധാര്‍ഷ്ട്യത്തിലാണ് ഇത്തരം ക്രൂരമായ പ്രവര്‍ത്തനങ്ങള്‍ നടക്കുന്നത്.
കുറ്റവാളികളെ സംരക്ഷിക്കുന്ന പ്രസ്താവനകളും പ്രവര്‍ത്തനങ്ങളുമാണ് ബി.ജെ.പിയുടെ നേതാക്കന്‍മാര്‍ നടത്തുന്നതെന്നും കെ.എസ്.യു ജില്ലാ കമ്മിറ്റി ആരോപിച്ചു.
രാജ്യവ്യാപകമായി രാഹുല്‍ ഗാന്ധിയുടെ സമരത്തിന് ഐക്യദാര്‍ഡ്യം അറിയിച്ച് കെ.എസ്.യു ജില്ലാ കമ്മിറ്റിയുടെ നേതൃത്വത്തില്‍ കൊല്ലം റെയില്‍വെ സ്റ്റേഷനില്‍ ട്രെയ്ന്‍ തടഞ്ഞു.
കെ.എസ്.യു ജില്ലാ കമ്മിറ്റിയുടെ നേതൃത്വത്തില്‍ നടന്ന സമരം കെ.എസ്.യു ജില്ലാ പ്രസിഡന്റ് വിഷ്ണു വിജയന്‍, സംസ്ഥാന ജനറല്‍ സെക്രട്ടറി സുഹൈല്‍ അന്‍സാരി, സംസ്ഥാന സെക്രട്ടറി ആദര്‍ശ് ഭാര്‍ഗവന്‍, ഷെഫീഖ് കിളികൊല്ലൂര്‍, ജില്ലാ ഭാരവാഹികളായ കൗശിഖ് എം. ദാസ്, ശരത് മോഹന്‍, അതുല്‍ എസ്.പി, സിയാദ് ഭരണിക്കാവ്, യദുകൃഷ്ണന്‍, ഷാന്‍ വടക്കേവിള, അര്‍ഷാദ്, സച്ചു പ്രതാപ്, അനന്തന്‍ പന്മന, അമ്മു രാജന്‍ സമരത്തിന് നേതൃത്വം നല്‍കി.

ബി.ജെ.പി ഭരണത്തില്‍ ജനങ്ങള്‍ അകാരണമരണം ഏറ്റുവാങ്ങുന്നെന്ന്

കൊല്ലം: സവര്‍ണവര്‍ഗ്ഗം നയിക്കുന്ന ബി.ജെ.പി ഭരണത്തില്‍ മതന്യൂനപക്ഷങ്ങളും പാര്‍ശ്വവല്‍കരിക്കപ്പെട്ട ജനവിഭാഗങ്ങളും അകാരണമായി മരണം ഏറ്റുവാങ്ങുന്നതായി ബിന്ദുകൃഷ്ണ. 8 വയസുകാരിയായ കുട്ടിയെ പോലും പരിപാവനമായ ക്ഷേത്രത്തിനുള്ളില്‍ വച്ച് കാമവെറിയന്‍മാരായ ഹിന്ദുത്വ തീവ്രവാദികളുടെ പീഡനം ഏറ്റുവാങ്ങുകയും മരണം ഉറപ്പു വരുത്താന്‍ തല തല്ലിപൊളിക്കുകയും ചെയ്ത ക്രൂര മനസുകളെ അംഗീകരിക്കുകയും അവര്‍ക്ക് കാവലാളായി മാറുകയും ചെയ്യുന്ന ഇന്ത്യന്‍ ഭരണ ഭീകരതയ്ക്ക് എതിരെ ഇന്ത്യന്‍ മനസുകള്‍ തേങ്ങുകയാണ്.
കാശ്മീരില്‍ ക്രൂര പീഡനത്തിന് ഇരയായ പെണ്‍കുട്ടിയുടെ മരണത്തില്‍ പ്രതിഷേധിച്ച് ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ വായ്മൂടി കെട്ടികൊണ്ട് നടത്തിയ പ്രതിഷേധ ജാഥ ഉദ്ഘാടനം ചെയ്യുകയായിരുന്നു അവര്‍. നഗരത്തില്‍ നടന്ന പ്രകടനത്തില്‍ കുട്ടികളും സ്ത്രീകളും ഉള്‍പ്പടെ 100 കണക്കിന് പ്രവര്‍ത്തകര്‍ അണിചേര്‍ന്നു. പ്രസ്‌ക്ലബ്ബിന് മുന്നില്‍ നടന്ന പ്രതിഷേധ യോഗത്തില്‍ ഡി.സി.സി വൈസ് പ്രസിഡന്റ് എസ് വിപിന ചന്ദ്രന്‍ അധ്യക്ഷത വഹിച്ചു. ഡി.സി.സി ഭാരവാഹികളായ സൂരജ് രവി, കെ.ജി രവി, എന്‍ ഉണ്ണികൃഷ്ണന്‍, കോലത്ത് വേണുഗോപാല്‍ സംസാരിച്ചു.
ബ്ലോക്ക് പ്രസിഡന്റുമാരായ ആര്‍ രമണന്‍, എം ബദറുദ്ദീന്‍, ആര്‍ രാജ്‌മോഹന്‍ മണ്ഡലം പ്രസിഡന്റുമാരായ സുല്‍ഫിക്കര്‍ ഭൂട്ടോ, കോതേത്ത് ഭാസുരന്‍, മാമൂലയില്‍ സേതുകുട്ടന്‍ പ്രകടനത്തിന് നേതൃത്വം നല്‍കി.