പേരാവൂര്‍:ചെക്യേരി വനമേഖലയില്‍ വാറ്റുകേന്ദ്രം തകര്‍ത്തു.കൊടന്നോടന്‍ പുഴക്കരയിലെ ചാരായവാറ്റു കേന്ദ്രമാണ് എക്‌സൈസ് സംഘം പരിശോധനയില്‍ തകര്‍ത്തത്.പേരാവൂര്‍ എക്‌സൈസ് റേഞ്ച്, വനംവകുപ്പുമായി ചേര്‍ന്നാണ് റെയ്ഡ് നടത്തിയത്.
വനത്തിലെ വാറ്റുകേന്ദ്രത്തില്‍ ഉടമസ്ഥനില്ലാത്ത നിലയില്‍ ചാരായം വാറ്റാന്‍ പാകപ്പെടുത്തി പ്ലാസ്റ്റിക് ബാരലില്‍ സൂക്ഷിച്ച 200 ലിറ്റര്‍ വാഷും വാറ്റുപകരണങ്ങളുമാണ് പിടിച്ചെടുത്തത്.
വാഷിനു പുറമേ, പുഴയുടെ മുകളിലെ നീരൊഴുക്കില്‍ നിന്ന് വാറ്റു കേന്ദ്രത്തിലേക്ക് വെള്ളമെത്തിക്കാനുള്ള കറുത്ത പ്ലാസ്റ്റിക് പൈപ്പ്, വാറ്റുപകരണങ്ങള്‍ തുടങ്ങിയവയും എക്‌സൈസ് സംഘം കസ്റ്റഡിയിലെടുത്തു.പുറമേ നിന്ന് ആളുകള്‍ക്ക് എത്തിപ്പെടാന്‍ ദുഷ്‌കരമായ വനമേഖലയിലാണ് വാറ്റുകേന്ദ്രം പ്രവര്‍ത്തിച്ചിരുന്നത്.
എക്‌സൈസ് ഇന്‍സ്‌പെക്ടര്‍ കെ.കെ.ഷിജില്‍ കുമാര്‍, പ്രിവന്റീവ് ഓഫീസര്‍മാരായ എം.പി.സജീവന്‍, പി.സി.ഷാജി, സിവില്‍ എക്‌സൈസ് ഓഫീസര്‍മാരായ സതീഷ് വിങ്ങോട്ടുഞാലില്‍, കെ.എ.മജീദ്, ഷൈബി കുര്യന്‍, കെ.ശ്രീജിത്ത് റെയ്ഡില്‍ പങ്കെടുത്തു.