ജയ്പൂര്‍: ഐ.പി.എല്ലില്‍ മൂന്നാം വിജയം സ്വന്തമാക്കി കൊല്‍ക്കത്ത നൈറ്റ് റൈഡേഴ്‌സ്. രാജസ്ഥാന്‍ റോയല്‍സിനെ ഏഴ് വിക്കറ്റിന് വീഴ്ത്തിയാണ് കൊല്‍ക്കത്ത മൂന്നാം വിജയത്തിലേക്കെത്തിയത്. ആദ്യം ബാറ്റ് ചെയ്ത രാജസ്ഥാന്‍ നിശ്ചിത 20 ഓവറില്‍ എട്ട് വിക്കറ്റ് നഷ്ടത്തില്‍ 160 റണ്‍സെന്ന ഭേദപ്പെട്ട സ്‌കോര്‍ പടുത്തുയര്‍ത്തി. വിജയം തേടിയിറങ്ങിയ കൊല്‍ക്കത്ത 18.5 ഓവറില്‍ മൂന്ന് വിക്കറ്റ് നഷ്ടത്തില്‍ 163 റണ്‍സെടുത്താണ് ലക്ഷ്യം കണ്ടത്.
വിജയത്തിലേക്ക് ബാറ്റേന്തിയ കൊല്‍ക്കത്തയ്ക്ക് തുടക്കത്തില്‍ തന്നെ ക്രിസ് ലിനിനെ നഷ്ടമായി. പിന്നീട് സുനില്‍ നരെയ്ന്‍ (35), റോബിന്‍ ഉത്തപ്പ (48), നിതീഷ് റാണ (പുറത്താകാതെ 35), ക്യാപ്റ്റന്‍ ദിനേഷ് കാര്‍ത്തിക് (പുറത്താകാതെ 42) എന്നിവരുടെ ബാറ്റിങ് മികവില്‍ അവര്‍ വിജയം അനായാസമായി സ്വന്തമാക്കി. രാജസ്ഥാനായി ഗൗതം രണ്ട് വിക്കറ്റെടുത്തു.
ടോസ് നേടി കൊല്‍ക്ക രാജസ്ഥാനെ ബാറ്റിങിനയക്കുകയായിരുന്നു. ക്യാപ്റ്റന്‍ രഹാനെയും (36), ഡിആര്‍സി ഷോര്‍ടും (44) ചേര്‍ന്ന് മികച്ച തുടക്കമാണ് രാജസ്ഥാന് നല്‍കിയത്. എന്നാല്‍ ഇരുവരും പുറത്തായതോടെ അവരുടെ സ്‌കോറിങിന് വേഗം കുറഞ്ഞു. മികച്ച ഫോമില്‍ നില്‍ക്കുന്ന മലയാളി സഞ്ജു സാംസണ്‍ ഏഴ് റണ്‍സില്‍ പുറത്തായത് ടീമിനെ കാര്യമായി ബാധിച്ചു. മധ്യനിരയില്‍ ജോസ് ബട്‌ലര്‍ 24 റണ്‍സുമായി പുറത്താകാതെ നിന്നു.
കൊല്‍ക്കത്തയ്ക്കായി നിതീഷ് റാണ, ടോം ക്യുറന്‍ എന്നിവര്‍ രണ്ട് വീതം വിക്കറ്റുകള്‍ വീഴ്ത്തി. പിയൂഷ് ചൗള, കുല്‍ദീപ് യാദവ്, ശിവം മവി എന്നിവര്‍ ഓരോ വിക്കറ്റെടുത്തു.