ഹൈദരബാദ്: നായകന്‍ കെവിന്‍ വില്യംസണ്‍ തിളങ്ങിയ മത്സരത്തിലും വിജയം നുകരാന്‍ സണ്‍റൈസേഴ്‌സിന് കഴിഞ്ഞില്ല. ചെന്നൈ സൂപ്പര്‍ കിങ്‌സിനെതിരായ മത്സരത്തില്‍ സണ്‍റൈസേഴ്‌സിന് നാലു റണ്‍സിന്റെ തോല്‍വി. അവസാന പന്തില്‍ വിജയിക്കാന്‍ ആവശ്യമായ ആറു റണ്‍സ് നേടാന്‍ റാഷിദ് ഖാന് കഴിഞ്ഞില്ല. സണ്‍റൈസേഴ്‌സിനായി കെയ്ന്‍ വില്യംസണ്‍ (84), യൂസുഫ് പത്താന്‍ (45) എന്നിവര്‍ തിളങ്ങി. 20 ഓവറില്‍ ആറു വിക്കറ്റ് നഷ്ടത്തില്‍ 178 റണ്‍സ് എടുക്കാന്‍ മാത്രമാണ് സണ്‍റൈസേഴ്‌സിന് കഴിഞ്ഞത്. മുന്‍നിരയിലെ നിര്‍ണായകമായ മൂന്നു വിക്കറ്റ് വീഴ്ത്തിയ ദീപക് ചഹറിന്റെ പ്രകടനമാണ് ചെന്നൈ വിജയത്തില്‍ നിര്‍ണായകമായത്.

നേരത്തെ ബാറ്റ് ചെയ്ത ചെന്നൈ അമ്പാട്ടി റായിഡു-റെയ്‌ന കൂട്ടുക്കെട്ടിലാണ് മികച്ച സ്‌കോര്‍ കണ്ടെത്തിയത്. 20 ഓവറില്‍ മൂന്നു വിക്കറ്റ് നഷ്ടത്തില്‍ 182 റണ്‍സാണ് ചെന്നൈ നേടിയത്. രണ്ടു പേരും അര്‍ധസെഞ്ച്വറി നേടി മത്സരത്തില്‍ ഇരുവരും മൂന്നാം വിക്കറ്റില്‍ 112 റണ്‍സിന്റെ സെഞ്ച്വറി കൂട്ടുക്കെട്ടാണ് സ്വന്തമാക്കിയത്. റായിഡുവും (79) റെയ്‌നയും (53) അര്‍ധസെഞ്ച്വറികള്‍ കരസ്ഥമാക്കി.