കോഴിക്കോട്: വെല്‍ഫെയര്‍ പാര്‍ട്ടിക്കും ബി.ജെപിക്കും ഒരേ നിറമെന്ന് മന്ത്രി കെ.ടി ജലീല്‍. ഹര്‍ത്താലിന്റെ മറവില്‍ നടന്ന അക്രമത്തെ സാമുദായികവല്‍ക്കരിച്ച ജലീല്‍ രാജിവയ്ക്കണമെന്ന് വെല്‍ഫെയര്‍ പാര്‍ട്ടി ആവശ്യപ്പെട്ടിരുന്നു. ഇതിന് മറുപടിയായാണ് ജലീല്‍ വെല്‍ഫെയര്‍ പാര്‍ട്ടിക്കു ബി.ജെ.പിയുടെ നിറമാണെന്ന് അഭിപ്രായപ്പെട്ടിരിക്കുന്നത്. താനൂരില്‍ ഹര്‍ത്താലില്‍ തകര്‍ന്ന ചില കടകള്‍ മാത്രം സന്ദര്‍ശിച്ചു മന്ത്രി കെ.ടി ജലീല്‍ ഹര്‍ത്താലിനു വര്‍ഗീയം നിറം നല്‍കിയെന്നു മുസ്‌ലിംലീഗും ആരോപിച്ചിരുന്നു. താനൂരിലെ കെ. ആര്‍ ബേക്കറി മാത്രം സന്ദര്‍ശിച്ചതിന്റേയും അതു പുനഃസ്ഥാപിക്കാന്‍ പണം പിരിച്ചെടുത്തതിന്റേയും കാരണവും ജലീല്‍ കുറിപ്പില്‍ പറയുന്നു. തൊട്ടടുത്ത ദിവസം കട തുറക്കാനാകാത്ത വിധം മറ്റൊരു കടയിലും ഹര്‍ത്താലുകാരുടെ ആവേശ പ്രകടനത്തില്‍ ഒന്നും സംഭവിച്ചിട്ടില്ല. ജമാഅത്തേ ഇസ്‌ലാമിയുടെ രാഷ്ട്രീയ പാര്‍ട്ടിയായ വെല്‍ഫെയര്‍ പാര്‍ട്ടിയുടെ ഉറഞ്ഞുതുള്ളല്‍ എന്തിന് വേണ്ടിയായിരുന്നുവെന്നും ജലീല്‍ ചോദിക്കുന്നു. ലീഗിന്റെ മനഃപ്രയാസം അവരെ അടുത്തറിയുന്നവര്‍ക്ക് എളുപ്പം മനസ്സിലാക്കാനാകുമെന്നും ജലീല്‍ പറയുന്നു.