ഹൈദരാബാദ്: ഐ.പി.എല്ലില്‍ ഇന്നലെ നടന്ന ആദ്യ മത്സരത്തില്‍ ചെന്നൈ സൂപ്പര്‍ കിങ്‌സിന് വിജയം. സണ്‍റൈസേഴ്‌സ് ഹൈദരാബാദിനെ നാല് റണ്‍സിന് വീഴ്ത്തിയാണ് ചെന്നൈ വിജയം പിടിച്ചത്. ജയത്തോടെ ചെന്നൈ ഒന്നാം സ്ഥാനത്തേക്ക് കയറി. ആദ്യം ബാറ്റ് ചെയ്ത ചെന്നൈ നിശ്ചിത 20 ഓവറില്‍ മൂന്ന് വിക്കറ്റ് നഷ്ടത്തില്‍ 182 റണ്‍സെന്ന മികച്ച സ്‌കോര്‍ സ്വന്തമാക്കിയപ്പോള്‍ ഹൈദരാബാദിന്റെ പോരാട്ടം ആറ് വിക്കറ്റ് നഷ്ടത്തില്‍ 178 റണ്‍സില്‍ അവസാനിപ്പിച്ചാണ് ചെന്നൈ വിജയത്തിലെത്തിയത്.
ലക്ഷ്യത്തിലേക്ക് ബാറ്റേന്തിയ ഹൈദരാബാദിന്റെ തുടക്കം തകര്‍ച്ചയോടെയായിരുന്നു. ധവാന് പകരം ടീമിലെത്തിയ റിക്കി ഭുയി അഞ്ചാം പന്തില്‍ തന്നെ പുറത്തായി. പിന്നാലെയെത്തിയ മനീഷ് പാണ്ഡെയും ദീപക് ഹൂഡയും പവലിയന്‍ കയറിയതോടെ അവര്‍ മൂന്ന് വിക്കറ്റ് നഷ്ടത്തില്‍ 22 റണ്‍സെന്ന നിലയിലേക്ക് വീണു. ഒരറ്റം കാത്ത ക്യാപ്റ്റന്‍ കെയ്ന്‍ വില്ല്യംസന് കൂട്ടായി ഷാകിബ് അല്‍ ഹസന്‍ എത്തിയതോടെയാണ് അവര്‍ ട്രാക്കിലായത്. ഇരുവരും ചേര്‍ന്ന് സ്‌കോര്‍ മുന്നോട്ട് കൊണ്ടുപോയി. 19 പന്തില്‍ 24 റണ്‍സുമായി ഷാകിബ് മടങ്ങി. പിന്നീട് നായകന് കൂട്ടായി യൂസുഫ് പത്താന്‍ എത്തിയതോടെ ഹൈദരാബാദ് ഒരുവേള വിജയം പോലും പ്രതീക്ഷിച്ചു.
എന്നാല്‍ 51 പന്തില്‍ അഞ്ച് വീതം ഫോറും സിക്‌സും പറത്തി 84 റണ്‍സെടുത്ത വില്ല്യംസനും 27 പന്തില്‍ നാല് സിക്‌സും ഒരു ഫോറും സഹിതം 45 റണ്‍സെടുത്ത പത്താനും മടങ്ങിയതോടെ ഹൈദരാബാദ് വീണ്ടും സമ്മര്‍ദ്ദത്തിലായി.
അവസാന ഘട്ടത്തില്‍ നാല് പന്തില്‍ രണ്ട് സിക്‌സും ഒരു ഫോറും സഹിതം 17 റണ്‍സ് വാരി റാഷിദ് ഖാന്‍ അവരെ വിജയത്തിന്റെ വക്ക് വരെയെത്തിച്ചെങ്കിലും ചെന്നൈ മത്സരം കൈവിടാതെ കാത്തു. അവസാന ഓവറില്‍ 18 റണ്‍സായിരുന്നു ഹൈദരാബാദിന് ആവശ്യം. ഒരു സിക്‌സും ഫോറുമടക്കം 14 റണ്‍സ് വരെ നേടാന്‍ റാഷിദിന് സാധിച്ചു. എന്നാല്‍ വിജയത്തിലെക്കാന്‍ കഴിഞ്ഞില്ല. ചെന്നൈയ്ക്കായി ദീപക് ചഹര്‍ നാലോവറില്‍ 15 റണ്‍സ് മാത്രം വഴങ്ങി മൂന്ന് വിക്കറ്റുകള്‍ വീഴ്ത്തി.
നേരത്തെ ടോസ് നേടി ഹൈദരാബാദ് ബൗളിങ് തിരഞ്ഞെടുക്കുകയായിരുന്നു. ഫോമിലുള്ള ഷെയ്ന്‍ വാട്‌സനെ തുടക്കത്തില്‍ തന്നെ ചെന്നൈയ്ക്ക് നഷ്ടമായി. പിന്നാലെ ഫാഫ് ഡുപ്ലെസിസും കൂടാരം കയറി. മൂന്നാം വിക്കറ്റില്‍ ഒത്തുചേര്‍ന്ന സുരേഷ് റെയ്‌ന- അമ്പാട്ടി റായിഡു സഖ്യത്തിന്റെ കിടയറ്റ ബാറ്റിങാണ് ചെന്നൈയ്ക്ക് മികച്ച സ്‌കോര്‍ സമ്മാനിച്ചത്. റെയ്‌ന 43 പന്തില്‍ 54 റണ്‍സുമായി പുറത്താകാതെ നിന്നു.
അമ്പാട്ടി റായിഡു 37 പന്തില്‍ ഒന്‍പത് ഫോറും നാല് സിക്‌സും സഹിതം 79 റണ്‍സ് അടിച്ചെടുത്തു. കളി അവസാനിക്കുമ്പോള്‍ റെയ്‌നയ്‌ക്കൊപ്പം നായകന്‍ ധോണി 12 പന്തില്‍ 25 റണ്‍സുമായി പുറത്താകാതെ നിന്നു. ഹൈദരാബാദിനായി ഭുവനേശ്വര്‍ കുമാറും റാഷിദ് ഖാനും ഓരോ വിക്കറ്റെടുത്തു. അമ്പാട്ടി റായിഡുവാണ് കളിയിലെ കേമന്‍.