മാഡ്രിഡ്: സ്പാനിഷ് കിങ്‌സ് കപ്പ് കിരീടം ബാഴ്‌സലോണയ്ക്ക്. തുടര്‍ച്ചയായ നാലാം തവണയാണ് ബാഴ്‌സ കിങ്‌സ് കപ്പ് സ്വന്തമാക്കുന്നത്. അവരുടെ 30ാം കിങ്‌സ് കപ്പ് നേട്ടം കൂടിയാണിത്. ഫൈനലില്‍ സെവിയ്യയെ മറുപടിയില്ലാത്ത അഞ്ച് ഗോളുകള്‍ക്ക് തകര്‍ത്താണ് ബാഴ്‌സലോണ കിരീട നേട്ടം അവിസ്മരണീയമാക്കിയത്. ലയണല്‍ മെസ്സി, ലൂയീസ് സുവാരസ് എന്നിവരുടെ മികവാണ് കറ്റാലന്‍ സംഘത്തിന്റെ കിരീട നേട്ടത്തിന്റെ കാതല്‍. സുവാരസ് ഇരട്ട ഗോളുകള്‍ നേടിയപ്പോള്‍ ശേഷിച്ച ഗോളുകള്‍ മെസ്സി, ഇനിയെസ്റ്റ, കുട്ടീഞ്ഞോ എന്നിവര്‍ വലയിലാക്കി. അടുത്ത ഞായറാഴ്ച ഡിപോര്‍ടീവോ ലാ കൊരുണയെ നേരിടാനിറങ്ങുന്ന ബാഴ്‌സലോണ അന്ന് വിജയിച്ചാല്‍ ലാ ലിഗ കിരീടവും ഉറപ്പിക്കും. ഇത്തവണ ചാംപ്യന്‍സ് ലീഗിന്റെ ക്വാര്‍ട്ടറില്‍ പുറത്തായതിന്റെ ക്ഷീണം ഇരട്ട കിരീട നേട്ടത്തോടെ തീര്‍ക്കാനുള്ള ഒരുക്കത്തിലാണ് അവര്‍.
കളിയുടെ ആദ്യ പകുതിയില്‍ മൂന്നും രണ്ടാം പകുതിയില്‍ രണ്ടും ഗോളുകളാണ് ബാഴ്‌സ എതിരാളിയുടെ വലയില്‍ നിക്ഷേപിച്ചത്. 14ാം മിനുട്ടില്‍ സുവാരസാണ് ഗോള്‍ വേട്ടയ്ക്ക് തുടക്കമിട്ടത്. പിന്നാലെ 31ാം മിനുട്ടില്‍ മെസ്സിയും ഗോള്‍ നേടി ലീഡ് രണ്ടാക്കി ഉയര്‍ത്തി. 40ാം മിനുട്ടില്‍ തന്റെ രണ്ടാം ഗോളിലൂടെ സുവാരസ് ലീഡുയര്‍ത്തി.
രണ്ടാം പകുതി തുടങ്ങി 52ാം മിനുട്ടിലെത്തിയപ്പോള്‍ ഇനിയെസ്റ്റ നാലാം ഗോള്‍ നേടി. 69ാം മിനുട്ടില്‍ ലഭിച്ച പെനാല്‍റ്റി വലയിലാക്കി കുട്ടീഞ്ഞോ ടീമിന്റെ പട്ടിക പൂര്‍ത്തിയാക്കി.
ബാഴ്‌സലോണയ്ക്കായി തന്റെ അവസാന കിങ്‌സ് കപ്പ് പോരാട്ടത്തിനാണ് ഇനിയെസ്റ്റ ഇറങ്ങിയത്. ഈ സീസണോടെ ഇനിയെസ്റ്റ ബാഴ്‌സലോണ വിടുമെന്ന് റിപ്പോര്‍ട്ടുകളുണ്ട്.