വടകര: അഴിയൂരില്‍ കോവുക്കല്‍ കടവിലെ പഴകിയ കെട്ടിടത്തില്‍ പൊലിസ് നടത്തിയ പരിശോധനയില്‍ ആയുധങ്ങള്‍ പിടികൂടി. ഇരുമ്പ് പൈപ്പുകളും ദണ്ഢുകളുമാണ് പിടിച്ചെടുത്തത്.
ആയുധങ്ങള്‍ പൊലിസ് കസ്റ്റഡിയിലെടുത്തു. രഹസ്യവിവരത്തെ തുടര്‍ന്ന് ചോമ്പാല എസ്.ഐ പി.കെ ജിതേഷും സംഘവും നടത്തിയ പരിശോധനയിലാണ് ആയുധങ്ങള്‍ കണ്ടെത്തിയത്. അഴിയൂരില്‍ ചില സംഘങ്ങള്‍ നിരന്തരം പ്രശ്‌നങ്ങളുണ്ടാക്കാറുണ്ട്. ഒരാഴ്ച മുന്‍പും ഇവിടെ നടന്ന സംഘര്‍ഷത്തില്‍ യുവാവിന് കുത്തേറ്റിരുന്നു.
കല്ലാമല, കോവുക്കല്‍ കടവ്, പനാട, കോറോത്ത് റോഡ് എന്നിവിടങ്ങളിലാണ് വര്‍ഷങ്ങളായി സാമുഹ്യ വിരുദ്ധര്‍ അഴിഞ്ഞാടുന്നത്. ആയുധങ്ങള്‍ പിടിച്ചെടുത്തതിന്റെ പശ്ചാത്തലത്തില്‍ പ്രദേശത്ത് കൂടുതല്‍ അന്വേഷണം ആരംഭിച്ചു.