ചങ്ങനാശേരി:പാക്ക് ചെയ്ത ഭക്ഷ്യവസ്തുക്കളും മറ്റും കാലാവധി കഴിഞ്ഞ ശേഷവും കടകളില്‍ വില്‍പന നടത്തിയാല്‍ നടപടിയെടുക്കേണ്ടത് ഭക്ഷ്യസുരക്ഷാ വിഭാഗമാണെന്നാണ് പൊതുവിലുള്ള ധാരണ ഇനി മാറ്റാം.
ഇത്തരം പരിശോധനകളുമായി കടയില്‍ പൊലിസിനെ കണ്ടാല്‍ അത്ഭുതം കൊള്ളേണ്ട. കാരണം കട പരിശോധന മാത്രമല്ല. കാലാവധി കഴിഞ്ഞ സാധനങ്ങള്‍ വില്‍ക്കുകയോ മറ്റോ ചെയ്താല്‍ കടക്കാരനെ പൊലിസ് കടയുടമയെ പിടികൂടുകയും ചെയ്യും. ജനങ്ങളുടെ ആരോഗ്യത്തിന് തന്നെ ഭീഷണി ഉയര്‍ത്തുന്ന ഇത്തരത്തിലുള്ള ഭക്ഷ്യവസ്തുക്കള്‍ വില്‍പന നടത്തുന്നത് കണ്ടെത്തി തടയണമെന്ന് സംസ്ഥാന പൊലിസ് മേധാവി ലോക്‌നാഥ്‌ബെഹ്‌റ നിര്‍ദേശം നല്‍കി ജില്ലാ ക്രൈംബ്രാഞ്ച് മുഖേനയാണ് പരിശോധനയും നിയമ നടപടികളും നടത്തുക.
കുട്ടികള്‍ക്ക് നല്‍കുന്ന ഭക്ഷ്യവസ്തുക്കള്‍ ഉള്‍പ്പെടെ കാലാവധി കഴിഞ്ഞ ശേഷവും പുതിയ സ്റ്റിക്കറും തിയതിയുമായി വീണ്ടും വില്‍പന നടത്തുന്നത് മിക്കയിടങ്ങളില്‍ കണ്ടെത്തിയതിനെത്തുടര്‍ന്നാണ് പോലീസ് മേധാവി നടപടിക്ക് ശുപാര്‍ശ ചെയ്തത്.
നഗരത്തിന്റെ പലയിടത്തും കാലാവധി കഴിഞ്ഞ ശേഷമുള്ള ഭക്ഷ്യ വസ്തുക്കള്‍ പുതിയ പാക്കറ്റുകളിലേക്ക് മാറ്റിയ ശേഷം വില്‍പന നടത്തുന്നതായി വ്യാപകമായ പരാതി ഉയര്‍ന്നിരിന്നു. ഭക്ഷ്യസുരക്ഷാ വകുപ്പ് കാര്യക്ഷമമായി ഇടപെടാത്തത് മുലം ഇത്തരക്കാര്‍ പിടിക്കപ്പെടുന്നതും കുറവായിരുന്നു. വ്യാപാരികള്‍ക്കും ഉപഭോക്താക്കള്‍ക്കും ബുദ്ധിമുട്ടുണ്ടാകാത്ത തരത്തിലായിരിക്കണം പരിശോധന നടത്തുന്നതെന്നും പൊലിസ് പറഞ്ഞു.