മുക്കം: പരിസ്ഥിതി ദിനത്തോടനുബന്ധിച്ച് കുമാരനല്ലൂര്‍ കാരമൂല ആസാദ് മെമ്മോറിയല്‍ യു.പി സ്‌കൂളിന്റെ ആഭിമുഖ്യത്തില്‍ 'അങ്ങാടിക്കൊരു തണല്‍ വൃക്ഷത്തൈ' കാരമൂല അങ്ങാടിയില്‍ കാരശ്ശേരി ഗ്രാമപഞ്ചായത്ത് മെമ്പര്‍ വി.എന്‍ ജംനാസ് ഉദ്ഘാടനം ചെയ്തു. പി.ടി.എ പ്രസിഡന്റ് സലാം തേക്കുംകുറ്റി അധ്യക്ഷനായി. കലാകാരന്‍ കൊച്ചു ബാലകഷ്ണന്‍ മുഖ്യാതിഥിയായിരുന്നു.
സ്‌കൂള്‍ ഭരണാധികാരി നവാസ് ഓമശ്ശേരി പരിസ്ഥിതി ദിന സന്ദേശം നല്‍കി. കാലിക്കറ്റ് എന്‍.ഐ.ടിയിലെ പ്രൊഫസര്‍ ഡോ കെ. മുഹമ്മദ് ഷാഫി, ബി.ആര്‍.സി, ആര്‍.പിമാരായ സുബൈദ ടീച്ചര്‍, ഷിജി ടീച്ചര്‍, നൂറുദ്ദീന്‍ തേക്കുംകുറ്റി, ടി.പി ജബ്ബാര്‍ സംസാരിച്ചു. സ്‌കൂള്‍ പ്രധാനധ്യാപിക എം.പി ഷൈന ടീച്ചര്‍ സ്വാഗതവും, എം.സുനിത ടീച്ചര്‍ നന്ദിയും പറഞ്ഞു. പരിസ്ഥിതി സംരക്ഷണവുമായി ബന്ധപ്പെട്ട് വിവിധ ക്ലബ്ബുകളുടെ ആഭിമുഖ്യത്തില്‍ സ്‌കൂളില്‍ നടന്ന പ്രദര്‍ശനവും കലാപരിപാടികളും ശ്രദ്ധേയമായി. സ്‌കൂളിലേക്ക് വിദ്യാര്‍ഥികള്‍ വരുന്ന പ്രദേശങ്ങിലെ അങ്ങാടികളില്‍ വൃക്ഷത്തൈ നട്ടുപിടിപ്പിച്ച് സംരക്ഷിച്ച് തണല്‍ വൃക്ഷമാക്കുകയെന്ന ലക്ഷ്യത്തോടെയാണ് കുമാരനല്ലൂര്‍ ആസാദ് മെമ്മോറിയല്‍ യു.പി സ്‌കൂള്‍ 'അങ്ങാടിക്കൊരു തണല്‍ വൃക്ഷം' പദ്ധതി ആരംഭിച്ചത്.