തിരുവനന്തപുരം: പൊലിസ് കോണ്‍സ്റ്റബിള്‍ ഡ്രൈവര്‍ ഉള്‍പ്പെടെ 14 തസ്തികകളിലേക്ക് വിജ്ഞാപനം പുറപ്പെടുവിക്കാന്‍ പി.എസ്.സി തീരുമാനിച്ചു.
സാങ്കേതിക വിദ്യാഭ്യാസ വകുപ്പില്‍ ഹെഡ് ഓഫ് സെക്ഷന്‍ ഇന്‍ ആര്‍ക്കിടെക്ചര്‍, ലജിസ്ലേച്ചര്‍ സെക്രട്ടേറിയറ്റില്‍ റിപ്പോര്‍ട്ടര്‍ ഗ്രേഡ് രണ്ട് (തമിഴ്), വിവിധ കമ്പനി, ബോര്‍ഡ്, കോര്‍പറേഷനുകളില്‍ ടൈപ്പിസ്റ്റ് ക്ലര്‍ക്ക്, ക്ലാര്‍ക്ക് ടൈപ്പിസ്റ്റ്, ഡ്രൈവര്‍ കം ഓഫിസ് അറ്റന്‍ഡന്റ്, ജില്ലാ സഹകരണ ബാങ്കില്‍ ഡ്രൈവര്‍, പ്ലാന്റേഷന്‍ കോര്‍പറേഷനില്‍ മെഡിക്കല്‍ ഓഫിസര്‍, കെ.എം.എം.എല്‍ ജൂനിയര്‍ സ്റ്റെനോ ടൈപ്പിസ്റ്റ്, വിവിധ വകുപ്പുകളില്‍ എല്‍.ഡി.സി, കേരള സ്റ്റേറ്റ് കോ-ഓപ്പറേറ്റീവ് കയര്‍ മാര്‍ക്കറ്റിങ് ഫെഡറേഷന്‍ ലിമിറ്റഡില്‍ സെയില്‍സ് അസിസ്റ്റന്റ് ഗ്രേഡ് രണ്ട് (ജനറല്‍ & സൊസൈറ്റി) തുടങ്ങിയവയാണ് വിജ്ഞാപനം പുറപ്പെടുവിക്കുന്ന മറ്റു തസ്തികകള്‍.
വിവിധ തസ്തികകളില്‍ സാധ്യതാ പട്ടിക പ്രസിദ്ധീകരിക്കാനും നാല് തസ്തികകളിലേക്ക് ഓണ്‍ലൈന്‍ പരീക്ഷയും പത്തനംതിട്ട ജില്ലയില്‍ വിവിധ വകുപ്പുകളില്‍ ബൈന്‍ഡര്‍ ഗ്രേഡ് രണ്ട് (എന്‍.സി.എ- എസ്.സി) തസ്തികയിലേക്ക് ഒ.എം.ആര്‍ പരീക്ഷ നടത്തുന്നതിനും തീരുമാനിച്ചു. നാല് തസ്തികകളിലേക്കുള്ള അഭിമുഖത്തിനും ഇന്നലെ ചേര്‍ന്ന പി.എസ്.സി യോഗം തീരുമാനമെടുത്തു.