ന്യൂഡല്‍ഹി: 25 ലക്ഷം രൂപയുടെ കൈക്കൂലി ഇടപാടുമായി ബന്ധപ്പെട്ട് ഡയരക്ടറേറ്റ് ഓഫ് റവന്യൂ ഇന്റലിജന്‍സ് (ഡി.ആര്‍.ഐ) ഡയരക്ടര്‍ ജനറല്‍ ഉള്‍പ്പെടെ മൂന്നുപേരെ സി.ബി.ഐ അറസ്റ്റ് ചെയ്തു. ലുധിയാനയിലെ ഡയരക്ടര്‍ ജനറല്‍ ചന്ദ്രശേഖര്‍, രണ്ട് ഇടനിലക്കാര്‍ എന്നിവരെയാണ് അറസ്റ്റ് ചെയ്തത്.

ചന്ദര്‍ശേഖറിനു വേണ്ടി കൈക്കൂലി വാങ്ങുന്നതിനിടയിലാണ് ഇടനിലക്കാര്‍ പിടിയിലായത്. ഇതോടെ അറസ്റ്റ് ചെയ്ത ഉദ്യോഗസ്ഥനെ കൂടുതല്‍ അന്വേഷണങ്ങള്‍ക്കായി ഡല്‍ഹിയില്‍ എത്തിച്ചിട്ടുണ്ട്. തുടര്‍ന്നു ഡല്‍ഹിയിലും ലുധിയാനയിലും നോയിഡയിലുമടക്കം നിരവധിയിടങ്ങളില്‍ സി.ബി.ഐ റെയ്ഡ് നടത്തുകയും ചെയ്തു.

കഴിഞ്ഞ ജൂണില്‍ വിവിധ ഉല്‍പന്നങ്ങളുടെ കയറ്റുമതിക്കാര്‍ക്കിടയില്‍ ലുധിയാനയിലെ റവന്യൂ ഡയരക്ടരേറ്റ് പരിശോധന നടത്തിയിരുന്നു. ഇതിനിടെ ചില രേഖകള്‍ പിടിച്ചെടുക്കുകയും ചെയ്തു. 

ഇവയ്ക്കു മേലുള്ള നടപടികളില്‍നിന്ന് ഒഴിവാക്കാന്‍ മൂന്നു കോടി രൂപ കൈക്കൂലി ആവശ്യപ്പെട്ടെന്ന പരാതി സി.ബി.ഐക്കു മുന്നിലെത്തുകയായിരുന്നു. തുടര്‍ന്ന് ഈ കൈക്കൂലിയുടെ ആദ്യ ഗഡുവായ 25 ലക്ഷം രൂപ ഇടനിലക്കാരനു കൈമാറുമ്പോഴായിരുന്നു സി.ബി.ഐ നടപടി.