കാന്റര്‍ബറി: ഒരോവറില്‍ ആറു സിക്‌സെന്നു കേട്ടാല്‍ പെട്ടെന്ന് ഓര്‍മ വരുന്നത് ഈയിടെ വിരമിച്ച യുവരാജ് സിങ്ങിനെയായിരിക്കും. എന്നാല്‍ ഈ ഹിറ്റിലൂടെ താരത്തെ ഓര്‍ക്കാനുള്ള വിരുന്നൊരുക്കിയിരിക്കുകയാണ് ന്യൂസിലന്‍ഡ് താരം ലിയോ കാര്‍ട്ടര്‍. നോര്‍ത്തേണ്‍ നൈറ്റും കാന്റര്‍ബറി കിങ്‌സും തമ്മിലുള്ള സൂപ്പര്‍ സ്മാഷ് ലീഗിലാണ് താരം ഒരോവറില്‍ ആറ് സിക്‌സര്‍ പറത്തിയത്. അടി മേടിച്ചതാവട്ടെ, സ്പിന്നറായ ആന്റണ്‍ ഡേവ്‌സിച്ചും. ഈ നേട്ടത്തോടെ ഒരോവറില്‍ ആറ് സിക്‌സര്‍ പറത്തുന്ന ആദ്യ ന്യൂസിലന്‍ഡ് താരമായി ലിയോ കാര്‍ട്ടര്‍ മാറി. നേട്ടം കൈവരിക്കുന്ന ഏഴാം ലോകോത്തര താരം കൂടിയാണ് ലിയോ. കാന്റര്‍ബറി ഏഴു വിക്കറ്റിന്റെ തകര്‍പ്പന്‍ ജയവും സ്വന്തമാക്കി.
നോര്‍ത്തേണ്‍ നൈറ്റ്‌സ് ഉയര്‍ത്തിയ 220 റണ്‍സെന്ന ലക്ഷ്യം പിന്തുടര്‍ന്ന കാന്റര്‍ബറിയുടെ 16ാം ഓവറിലായിരുന്നു കാര്‍ട്ടറിന്റെ സിക്‌സടി മേളം. ആന്റണ്‍ ഡെവ്‌സിച്ച് എറിഞ്ഞ ഓവറിലെ ആറു പന്തുകളും ഇടം കൈയന്‍ ബാറ്റ്‌സ്മാനായ കാര്‍ട്ടര്‍ അനായാസം അതിര്‍ത്തി വരയ്ക്ക് മുകളിലൂടെ പറത്തി. മത്സരത്തില്‍ 29 പന്തില്‍ നിന്ന് 70 റണ്‍സും താരം സമ്പാദിച്ചു.
നേരത്തേ ഗാരി സോബേഴ്‌സ്, രവി ശാസ്ത്രി, ഹെര്‍ഷലെ ഗിബ്‌സ്, യുവരാജ് സിങ്, റോസ് വൈറ്റ്‌ലി, ഹസ്രത്തുല്ല സസായ് എന്നിവരാണ് ഇതിന് മുന്‍പ് ഈ നേട്ടം സ്വന്തമാക്കിയത്.