ന്യൂഡല്‍ഹി: അസംപൗരത്വപ്പട്ടികയില്‍ നിന്ന് പുറത്തായ കുട്ടികളെ തടങ്കല്‍പ്പാളയത്തിലടയ്ക്കുന്നതിനെതിരായ ഹരജിയില്‍ സുപ്രിംകോടതി കേന്ദ്രസര്‍ക്കാരിന് നോട്ടീസയച്ചു.
നാലാഴ്ചയ്ക്കുള്ളില്‍ മറുപടി നല്‍കണമെന്നാവശ്യപ്പെട്ടാണ് ചീഫ് ജസ്റ്റിസ് എസ്.എ ബോബ്‌ദെ, ജസ്റ്റിസുമാരായ ബി.ആര്‍ ഗവായ്, സൂര്യകാന്ത് എന്നിവരടങ്ങിയ ബെഞ്ച് നോട്ടീസയച്ചത്.
അസം പൗരത്വപ്പട്ടികയില്‍ നിന്ന് നിരവധി കുട്ടികള്‍ പുറത്തായിട്ടുണ്ട്. എന്നാല്‍ അവരുടെ മാതാപിതാക്കള്‍ പൗരത്വപ്പട്ടികയില്‍ ഉള്‍പ്പെടുകയും ചെയ്തിട്ടുണ്ട്. ഇവരെ മാതാപിതാക്കളില്‍ നിന്ന് വേര്‍പ്പെടുത്തി തടങ്കല്‍പ്പാളയങ്ങളിലേക്ക് അയക്കുന്നതിനെതിരേയായിരുന്നു ഹരജി.
അതേ സമയം പൗരത്വപ്പട്ടികയില്‍ നിന്ന് പുറത്തായ മാതാപിതാക്കള്‍ പൗരന്‍മാരായുള്ള കുട്ടികളെ തല്‍ക്കാലം ഡിറ്റന്‍ഷന്‍ സെന്ററുകളിലേക്ക് അയക്കില്ലെന്ന് അറ്റോര്‍ണി ജനറല്‍ കെ.കെ വേണുഗോപാല്‍ സുപ്രിംകോടതിയില്‍ ഉറപ്പു നല്‍കി. ഈ ഉറപ്പ് കേന്ദ്രത്തിന് നോട്ടീസ് അയച്ചുകൊണ്ടുള്ള ഉത്തരവില്‍ സുപ്രിംകോടതി രേഖപ്പെടുത്തി.

വര്‍ഗീയ പോസ്റ്റ്: പൗരത്വ കോ ഓര്‍ഡിനേറ്റര്‍
വിശദീകരണം നല്‍കണം

ന്യൂഡല്‍ഹി: പൗരത്വപ്പട്ടിക കോര്‍ഡിനേറ്റര്‍ ഹിതേഷ് ശര്‍മ സോഷ്യല്‍ മീഡിയയില്‍ വര്‍ഗീയ പരാമര്‍ശങ്ങളുള്ള പോസ്റ്റുകളിട്ടതിന് വിശദീകരണം നല്‍കണമെന്ന് കോടതി. മുതിര്‍ന്ന അഭിഭാഷകന്‍ കപില്‍ സിബലാണ് ഇതു സംബന്ധിച്ച ഹരജിയുമായി കോടതിയെ സമീപിച്ചത്. പ്രദീഖ് ഹജേലക്ക് പകരം വന്നയാളാണ് ശര്‍മ്മ.
പൗരത്വപ്പട്ടിക പൂര്‍ത്തിയായതിനാല്‍ പുതിയ പൗരത്വപ്പട്ടിക കോര്‍ഡിനേറ്റര്‍ക്ക് കാര്യമായ റോളൊന്നുമില്ലെന്ന് അസം സര്‍ക്കാരിന് വേണ്ടി ഹാജരായ അഭിഭാഷകന്‍ തുഷാര്‍ മേത്ത പറഞ്ഞു.
എന്നാല്‍ എന്തായാലും വിശദീകരണം നല്‍കിയെ മതിയാവൂ എന്നായിരുന്നു കോടതിയുടെ നിലപാട്.