മുക്കം (കോഴിക്കോട്): കാരശ്ശേരി പഞ്ചായത്തിലെ വിവിധ ഭാഗങ്ങളില്‍ കണ്ടെത്തിയ എച്ച്1 എന്‍1 നിയന്ത്രണ വിധേയമായതായും ജനങ്ങള്‍ക്കിടയില്‍ ഉണ്ടായ ഭീതി കുറഞ്ഞതായും ആരോഗ്യവകുപ്പ് അധികൃതര്‍. എച്ച്1 എന്‍1 ലക്ഷണങ്ങള്‍ പ്രകടിപ്പിക്കുന്നവരുടെ എണ്ണം കുറഞ്ഞിട്ടുണ്ട്. എന്നാലും ജനങ്ങള്‍ ജാഗ്രത പാലിക്കണമെന്ന് ആരോഗ്യവകുപ്പ് മുന്നറിയിപ്പ് നല്‍കി. എച്ച്1 എന്‍1 പനിയുടെ പ്രത്യേക മെഡിക്കല്‍ ക്യാംപ് ആനയാംകുന്ന് ഹയര്‍സെക്കന്‍ഡറി സ്‌കൂളില്‍ പുരോഗമിക്കുകയാണ്.
ജനങ്ങളുടെ ആശങ്കയകറ്റാന്‍ രോഗലക്ഷണങ്ങള്‍ ഉള്ളവരെ ആനയാംകുന്ന് സ്‌കൂളിലെ കണ്‍ട്രോള്‍ റൂമില്‍ നിന്നും നിരന്തരം ബന്ധപ്പെട്ട് കൊണ്ടിരിക്കുകയും അവരുടെ രോഗം വിലയിരുത്തുകയും ചെയ്യുന്നുണ്ടെന്ന് ജില്ലാ മെഡിക്കല്‍ ഓഫിസര്‍ അറിയിച്ചു.
ഡോ.ലതിക, ഡോ.അജു, മാസ് മീഡിയ ഓഫിസര്‍ മണി, കുമാരന്‍, ബ്ലോക്ക് മെഡിക്കല്‍ ഓഫിസര്‍ ഡോ. മനുലാല്‍, കാരശ്ശേരി പഞ്ചായത്ത് മെഡിക്കല്‍ ഓഫിസര്‍ ഡോ. സജ്‌ന, ഡോ. അശ്വിന്‍ സുരേഷ് എന്നിവരുടെ നേതൃത്വത്തിലാണ് ആനയാംകുന്ന് സ്‌കൂളില്‍ എച്ച്1 എന്‍1 ഔട്ട് ബ്രേക്ക് കണ്‍ട്രോള്‍ റൂം പ്രവര്‍ത്തിക്കുന്നത്.
പഞ്ചായത്ത് പ്രസിഡന്റ് വി.കെ വിനോദിന്റെ നേതൃത്വത്തില്‍ ഇന്നലെ പനിയുടെ സ്ഥിതിഗതികള്‍ ചര്‍ച്ചചെയ്തു. ആരോഗ്യ, വിദ്യാഭ്യാസ സ്ഥിരം സമിതി അധ്യക്ഷന്‍ സജി തോമസ്, പഞ്ചായത്ത് മെംബര്‍ സവാദ് ഇബ്രാഹിം എന്നിവര്‍ ചര്‍ച്ചയില്‍ സംബന്ധിച്ചു. 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂം, പ്രത്യേക പനി ക്ലിനിക് എന്നിവ സ്‌കൂളില്‍ പ്രവര്‍ത്തന സജ്ജമാണെന്ന് അധികൃതര്‍ അറിയിച്ചു.
ആവശ്യമുള്ളവര്‍ക്ക് 0495 2297260 ഫോണ്‍ നമ്പറില്‍ വിളിച്ച് സംശയനിവാരണം നടത്താം. പ്രത്യേക സാഹചര്യത്തില്‍ അവധി നല്‍കിയ വിദ്യാഭ്യാസ സ്ഥാപനങ്ങള്‍ ഇന്നുമുതല്‍ തുറന്നു പ്രവര്‍ത്തിക്കുമെന്ന് പഞ്ചായത്ത് പ്രസിഡന്റ് വി.കെ വിനോദ് അറിയിച്ചു.
പഞ്ചായത്തിലെ മുഴുവന്‍ സ്‌കൂളുകളിലും ഇന്ന് എച്ച്1 എന്‍ 1 ബോധവല്‍ക്കരണത്തിനായി പ്രത്യേക അസംബ്ലി ചേരും. ആരോഗ്യ വകുപ്പിന്റെ നേതൃത്വത്തില്‍ നാടെങ്ങും ബോധവല്‍ക്കരണ പരിപാടികള്‍ സംഘടിപ്പിക്കുമെന്നും പഞ്ചായത്ത് പ്രസിഡന്റ് അറിയിച്ചു.