ആലക്കോട്: ആകാശത്ത് വിസ്മയം തീര്‍ത്ത് ചെറുപുഴ സ്വദേശി സേവ്യര്‍. ജനശ്രീ മിഷന്‍ കലാമേളയുടെ സമാപനത്തിന്റെ ഭാഗമായാണ് ആലക്കോട് ടൗണില്‍ പാരാഗ്ലൈഡിങ് പ്രകടനം സംഘടിപ്പിച്ചത്. അരങ്ങം ക്ഷേത്ര മൈതാനിയില്‍ നിന്ന് വൈകുന്നേരം നാലോടെയാണ് ആകാശ പറക്കലിനുള്ള പ്രാരംഭ പ്രവൃത്തികള്‍ തുടങ്ങിയത്.
കൂറ്റന്‍ പാരച്യൂട്ട് മൈതാനിയില്‍ വിരിച്ചിട്ടതിനു ശേഷം ഗതി നിയന്ത്രിക്കാനുള്ള യന്ത്രം യോജിപ്പിക്കാന്‍ അരമണിക്കൂര്‍ സമയമെടുത്തു. കാറ്റിന്റെ ശക്തി കുറഞ്ഞത് പറന്നു പൊങ്ങാന്നുന്നതിനു രണ്ടു തവണ തടസമായി. ഒരു മണിക്കൂറിനു ശേഷം മൈതാനിയില്‍ തടിച്ചു കൂടിയ നൂറുകണക്കിന് ആളുകളെ സാക്ഷിനിര്‍ത്തി ജനശ്രീ ജില്ലാ ചെയര്‍മാന്‍ ചന്ദ്രന്‍ തില്ലങ്കേരി പാരാഗ്ലൈഡിങ് ഫഌഗ്ഓഫ് നടത്തി. കാറ്റിനോടൊപ്പം ആകാശത്ത് ഉയര്‍ന്നു പൊങ്ങിയ സേവ്യറിനെ കാണികള്‍ കരഘോഷത്തോടെയാണ് എതിരേറ്റത്. അരങ്ങം ക്ഷേത്രത്തിനു മുകളില്‍ വട്ടമിട്ടു പറന്നതിനു ശേഷം ആലക്കോട് ടൗണ്‌നു മുകളില്‍ ഒരു മണിക്കൂര്‍ നേരം അഭ്യാസ പ്രകടനങ്ങള്‍ നടത്തി.