ദുബൈ: അടുത്ത അധ്യയന വര്‍ഷം ഫീസ് വര്‍ധിപ്പിക്കാന്‍ ദുബൈയിലെ സ്വകാര്യ സ്‌കൂളുകള്‍ക്ക് സര്‍ക്കാര്‍ അനുമതി നല്‍കി. പ്രവര്‍ത്തന നിലവാരത്തിന്റെ അടിസ്ഥാനത്തിലായിരിക്കും വര്‍ധന.
ഫീസിനത്തില്‍ 2.4 ശതമാനം മുതല്‍ 4.8 ശതമാനം വരെ വര്‍ധനയ്ക്കാണ് നോളജ് ആന്‍ഡ് ഹ്യൂമന്‍ ഡെവലപ്‌മെന്റ് അതോറിറ്റി (കെ.എച്ച്.ഡി.എ) അനുമതി നല്‍കിയിരിക്കുന്നത്. ദുബൈ സ്റ്റാറ്റിക്‌സ് സെന്റര്‍ വാര്‍ഷിക വിദ്യാഭ്യാസ നിലവാര സൂചിക (ഇ.സി.ഐ) തയാറാക്കിയിട്ടുണ്ട്. അതേസമയം, പുതിയ സ്വകാര്യ സ്‌കൂളുകള്‍ക്ക് പ്രവര്‍ത്തനമാരംഭിച്ച് മൂന്നു വര്‍ഷത്തേയ്ക്ക് ഫീസ് വര്‍ധിപ്പിക്കാന്‍ പാടില്ല.
ഉന്നത നിലവാരം പുലര്‍ത്തുന്ന സ്‌കൂളുകള്‍ക്ക് പരമാവധി 4.8 ശതമാനം വരെ ഫീസ് വര്‍ധിപ്പിക്കാം.
വളരെ നല്ല വിഭാഗത്തില്‍ 4.2 ശതമാനവും നല്ല സ്‌കൂളുകള്‍ക്ക് 3.6 ശതമാനവും ഫീസ് കൂട്ടാവുന്നതാണ്. കൊള്ളാവുന്നത്, പോരാത്തത്, വളരെ പോരായ്മയുള്ളത് വിഭാഗങ്ങളില്‍ 2.4 ശതമാനമാണ് നിരക്കു വര്‍ധന അനുവദിച്ചിരിക്കുന്നത്.
അധ്യാപകരുടെ ശമ്പളം, വാടക, അറ്റകുറ്റപ്പണികള്‍, വൈദ്യുതി,വെള്ളക്കരം തുടങ്ങിയവ കൂടി ഉള്‍പ്പെടുത്തി സ്‌കൂളിന്റെ നടത്തിപ്പു ചെലവ് വിലയിരുത്തിയാണ് ഇ.സി.ഐ നിശ്ചയിക്കുന്നത്. ഫീസ് നിരക്ക് വര്‍ധിപ്പിക്കുന്നതോടെ പ്രവാസി കുടുംബങ്ങളുടെ ജീവിതച്ചെലവ് ഇനിയുമേറെ ഉയരും.