അമ്പലപ്പുഴ: പുന്നപ്ര കാര്‍മല്‍ കോളജില്‍ നടന്ന വിദ്യാര്‍ഥി സംഘട്ടനത്തില്‍ നാലു പേര്‍ക്ക് പരുക്കേറ്റു. ഇവരെ ആശുപത്രിയില്‍ പ്രവേശിപ്പിച്ചു.
രണ്ടാം വര്‍ഷ മെക്കാനിക്കല്‍ എന്‍ജിനീയറിങ് വിദ്യാഥികളായ പുറക്കാട് തെക്കേയറ്റത്ത് സാബുവിന്റെ മകന്‍ സംഗീത് (20), മണ്ണഞ്ചേരി വെളിക്കകത്ത് വീട്ടില്‍ ബിജുവിന്റെ മകന്‍ അമല്‍ (20), തത്തംപള്ളി മഠത്തിപറമ്പ് വീട്ടില്‍ അജയകുമാറിന്റെ മകന്‍ അക്ഷയ് (20), ഗൗതം എന്നിവരെയാണു വണ്ടാനം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചത്.
ഇന്നലെ ഉച്ചയ്ക്ക് ഒരു മണിയോടെ പുന്നപ്ര കാര്‍മ്മല്‍ പോളിടെക്‌നിക്ക് കോളജിലായിരുന്നു സംഭവം. വാഴ്‌സ്ആപ്പില്‍ ട്രോള്‍ ഇട്ടതിന്റെ പേരില്‍ ജൂനിയര്‍ സീനിയര്‍ വിദ്യാര്‍ഥികള്‍ തമ്മില്‍ കഴിഞ്ഞ ദിവസം സംഘര്‍ഷത്തിനിടയായിരുന്നു.
ഇതിന്റെ തുടര്‍ച്ചയെന്നോണം ഇന്നലെ ഉച്ചയോടെ സീനിയര്‍ വിദ്യാര്‍ഥികള്‍ ജൂനിയര്‍ വിദ്യാര്‍ഥികളെ അക്രമിക്കുകയായിരുന്നു.
കല്ല്, കമ്പി, പട്ടിക എന്നിവ കൊണ്ടാണ് തങ്ങളെ അക്രമിച്ചതെന്ന് പരുക്കേറ്റ വിദ്യാര്‍ഥികള്‍ പറഞ്ഞു.
ഇതില്‍ അമലിന്റെ തലയ്ക്ക് ആറ് സ്റ്റിച്ചുകളുണ്ട്. സംഗീതിന്റെ കണ്ണകള്‍ക്ക് ഗുരുതരമായി പരുക്കേറ്റു. പ്രിന്‍സിപ്പല്‍ നല്‍കിയ പരാതിയെ തുടര്‍ന്ന് പുന്നപ്ര എസ്.ഐ ഇ.ഡി ബിജുവിന്റെ നേതൃത്വത്തില്‍ അന്വേഷണം ആരംഭിച്ചു.