പത്തനംതിട്ട: ശബരിമല കര്‍മസമിതിയെന്നത് ആര്‍.എസ്.എസ് അല്ലാതെ മറ്റൊന്നുമല്ലെന്ന് ദേവസ്വംമന്ത്രി കടകംപള്ളി സുരേന്ദ്രന്‍. തന്ത്രിയെ ആയുധമാക്കാന്‍ വേണ്ടി ശ്രമിക്കുകയാണ് ഇവര്‍. ആര്‍.എസ്.എസിന്റെ രാഷ്ട്രീയ ലാഭത്തിനുള്ള പ്രവര്‍ത്തനങ്ങള്‍ നട്തതുന്ന ഒരു സമിതി മാത്രമായിട്ട് കര്‍മസമിതി മാറിയിട്ടുണ്ടെന്നും കടകംപള്ളി പറഞ്ഞു.

ശബരിമലയില്‍ ശുദ്ധക്രിയ നടത്തിയ തന്ത്രിയുടെ നടപടി സുപ്രീം കോടതി വിധിയുടെ ലംഘനമാണ്. അത് അയിത്താചാരണമാണെന്ന വിമര്‍ശനവും ഇപ്പോള്‍ ഉയര്‍ന്നു കഴിഞ്ഞു. അങ്ങനെ ചെയ്യാന്‍ തന്ത്രിക്ക് അവകാശമില്ല.

തന്ത്രിക്കു മാത്രമായിട്ട് ഒരു തീരുമാനമെടുക്കാന്‍ സാധിക്കില്ല. തന്ത്രി ഏത് തീരുമാനമെടുക്കുന്നതിനു മുമ്പും ദേവസ്വം ബോര്‍ഡുമായി ആലോചിക്കണം. അത്തരമൊരു ആലോചന ഉണ്ടായിട്ടില്ലെന്ന് ദേവസ്വം ബോര്‍ഡ് വ്യക്തമാക്കിയിട്ടുണ്ട്. അതിന്റെ അടിസ്ഥാനത്തില്‍ തന്ത്രിയോട് വിശദീകരണം തേടിയിട്ടുണ്ട്. തന്ത്രിയുടെ വിശദീകരണം കിട്ടുന്ന മുറയ്ക്ക് ഉചിതമായിട്ടുള്ള തീരുമാനം ദേവസ്വം ബോര്‍ഡ് സ്വീകരിക്കുമെന്നും അദ്ദേഹം വ്യക്തമാക്കി.