കൊടുങ്ങല്ലൂര്‍: മുസ്‌ലിം വിദ്യാര്‍ഥിനികളോട് പാകിസ്താനിലേക്ക് പോകാന്‍ ഉപദേശിച്ച അധ്യാപകനെ സസ്‌പെന്‍ഡ് ചെയ്തു. ക്ലാസ് മുറിയില്‍ പൗരത്വ നിയമ ഭേദഗതിയെ അനുകൂലിച്ച് സംസാരിക്കുകയും കുട്ടികളോട് പാകിസ്താനിലേക്ക് പോകാനൊരുങ്ങിക്കൊള്ളാന്‍ ഉപദേശിക്കുകയും ചെയ്ത കൊടുങ്ങല്ലൂര്‍ ഗവ. ഗേള്‍സ് ഹൈസ്‌കൂളിലെ ഹിന്ദി അധ്യാപകന്‍ കെ.കെ കലേശനെയാണ് വിദ്യാഭ്യാസ വകുപ്പ് അന്വേഷണ വിധേയമായി സസ്‌പെന്‍ഡ് ചെയ്തത്.
തൃശൂര്‍ വിദ്യാഭ്യാസ ഡെപ്യൂട്ടി ഡയരക്ടര്‍ ഗീത വിദ്യാലയത്തിലെത്തി ആരോപണ വിധേയനായ അധ്യാപകനില്‍ നിന്ന് വിശദീകരണം തേടിയിരുന്നു. പരാതിക്കിടയാക്കിയ സംഭവം നടന്ന എട്ട് ബി ക്ലാസിലെ കുട്ടികളില്‍ നിന്നും രക്ഷിതാക്കളില്‍ നിന്നും ഡെപ്യൂട്ടി ഡയരക്ടര്‍ മൊഴിയെടുത്തു. പരാതി സത്യമാണെന്ന് അന്വേഷണത്തില്‍ ബോധ്യപ്പെട്ട സാഹചര്യത്തിലാണ് നടപടിയുണ്ടായത്. ആരോപണ വിധേയനായ അധ്യാപകനെതിരേ നടപടി സ്വീകരിക്കണമെന്ന് നഗരസഭാ ചെയര്‍മാന്‍ കെ.ആര്‍ ജൈത്രനും വിവിധ സംഘടനകളും ആവശ്യപ്പെട്ടിരുന്നു.
ക്ലാസ് പി.ടി.എ യോഗത്തിനിടെ രക്ഷിതാക്കളോട് പൗരത്വഭേദഗതി നിയമത്തെ അനുകൂലിച്ച് സംസാരിച്ച ഇയാള്‍ ക്ലാസ്മുറിയില്‍ വച്ച് കുട്ടികളോട് പാകിസ്താനില്‍ പോകാന്‍ തയാറായിക്കൊള്ളാന്‍ ഉപദേശിക്കുകയായിരുന്നു. സംഭവത്തെക്കുറിച്ച് ഒരു രക്ഷിതാവ് പരാതി പറയുന്നതിന്റെ ഫോണ്‍ ശബ്ദരേഖ പുറത്ത് വന്നതിനെ തുടര്‍ന്നാണ് വിഷയം വിവാദമായത്. സംഭവത്തില്‍ പ്രതിഷേധിച്ച് എസ്.എഫ്.ഐ കൊടുങ്ങല്ലൂര്‍ ഏരിയ കമ്മിറ്റി സ്‌കൂളിലേക്ക് മാര്‍ച്ച് നടത്തിയിരുന്നു. അധ്യാപകനെതിരേ നടപടി സ്വീകരിക്കണമെന്നാവശ്യപ്പെട്ട് എം.എസ്.എഫ് വിദ്യാഭ്യാസ വകുപ്പിന് പരാതിയും നല്‍കിയിരുന്നു.