കോട്ടയം: സ്ത്രീകള്‍ക്കെതിരെയുള്ള അതിക്രമം തടയാന്‍ സ്ത്രീ സുരക്ഷാ നിയമങ്ങള്‍ ശക്തമായി നടപ്പാക്കണമെന്ന് വനിതാ കമ്മീഷനംഗം ഡോ. പ്രമീളാ ദേവി പറഞ്ഞു. കോട്ടയം കലക്‌ട്രേറ്റ് കോണ്‍ഫറന്‍സ് ഹാളില്‍ നടന്ന അദാലത്തിനു ശേഷം മാധ്യമ പ്രവര്‍ത്തകരോട് സംസാരിക്കുകയായിരുന്നു അവര്‍.
നിലവിലുള്ള നിയമങ്ങളും പിങ്ക് പെട്രോളിങും നിര്‍ഭയ പോലുള്ള സ്ത്രീ സുരക്ഷാ പദ്ധതികളും ശക്തമായി നടപ്പാക്കപ്പെടണം. പ്രമുഖ നടിയുടെ പ്രശ്‌നത്തില്‍ കമ്മിഷന്‍ സ്വമേധയാ കേസെടുത്തിട്ടുണ്ട്.
എന്നാല്‍ പൊലിസ് അന്വേഷണം ശരിയായ രീതിയില്‍ പുരോഗമിക്കുന്നതിനാല്‍ ഈ ഘട്ടത്തില്‍ കമ്മിഷന്റെ ഇടപെടല്‍ ആവശ്യമില്ല. സ്ത്രീകള്‍ കൂടുതല്‍ ജാഗരൂകരാകണമെന്നും സ്ത്രീ സുരക്ഷ സമൂഹത്തിന്റെ തന്നെ സുരക്ഷയാണെന്നും അവര്‍ ചൂണ്ടിക്കാട്ടി.
90 കേസുകളാണ് പരിഗണിച്ചത്. ഇതില്‍ 63 കേസുകളില്‍ ഇരുകക്ഷികളും ഹാജരായി. 52 കേസുകള്‍ തീര്‍പ്പാക്കി. 22 കേസുകള്‍ അടുത്ത അദാലത്തില്‍ പരിഗണിക്കും. 16 കേസുകള്‍ പൊലിസ് ഉള്‍പ്പെടെയുള്ള വകുപ്പുകളുടെ റിപ്പോര്‍ട്ടിന് അയച്ചിട്ടുണ്ട്. വനിതാ സെല്‍ എസ് ഐ പി.ജി. വിജയമ്മ, അഡ്വക്കേറ്റുമാരായ ജെസ്സി പി. ജോര്‍ജ്, ജിഷ ബേബി തോമസ്, ജിജിമോള്‍ ദാസ് തുടങ്ങിയവര്‍ അദാലത്തില്‍ പങ്കെടുത്തു.