ന്യൂഡല്‍ഹി: നരേന്ദ്ര മോദി മുഖ്യമന്ത്രി ആയിരുന്ന 2002-2006 കാലഘട്ടത്തില്‍ ഗുജറാത്തില്‍ ഉണ്ടായ 22 വ്യാജ ഏറ്റുമുട്ടല്‍ കേസുകളില്‍ അന്വേഷണം ആവശ്യപ്പെട്ട് നല്‍കിയ ഹര്‍ജികള്‍  സുപ്രീം കോടതി ഇന്ന്      പരിഗണിക്കും.

ചീഫ് ജസ്റ്റിസ് രഞ്ജന്‍ ഗോഗോയ് ജസ്റ്റിസുമാരായ എല്‍. നാഗേശ്വര്‍ റാവു, സഞ്ജയ് കിഷന്‍ കൗള്‍ എന്നിവര്‍ അടങ്ങിയ ബെഞ്ച് ആണ് ഹര്‍ജി പരിഗണിക്കുന്നത്. വ്യാജ ഏറ്റുമുട്ടല്‍ കേസുകളെ കുറിച്ച് അന്വേഷിച്ച ജസ്റ്റിസ് എച്ച്.എസ് ബേദിയുടെ റിപ്പോര്‍ട്ടിനെ കുറിച്ച് ഗുജറാത്ത് സര്‍ക്കാര്‍ കോടതിയില്‍ നിലപാട് അറിയിച്ചേക്കും.

ബി.ജി വര്‍ഗീസ്, ജാവേദ് അക്തര്‍ എന്നിവര്‍ നല്‍കിയ ഹര്‍ജി ആണ് സുപ്രീം കോടതി പരിഗണിക്കുന്നത്. ജസ്റ്റിസ് എച്ച്.എസ് ബേദി റിപ്പോര്‍ട്ട് ഹര്‍ജിക്കാര്‍ക്ക് നല്‍കുന്നതിനെ ഗുജറാത്ത് സര്‍ക്കാരിന് വേണ്ടി ഹാജര്‍ ആയ തുഷാര്‍ മേത്ത കഴിഞ്ഞ തവണ എതിര്‍ത്തിരുന്നു.