ബാസിത് മുനീര്‍. പി.പി#

കോഴിക്കോട് ജില്ലയില്‍ കൂടരഞ്ഞി പഞ്ചായത്തിലെ തിരുവമ്പാടിക്കടുത്ത് പശ്ചിമഘട്ട മലനിരകളിലാണ് ഈ പ്രദേശം. മുക്കത്ത് നിന്ന് 21 കി.മീ മാത്രം ദൂരം. മലമുകളില്‍ ആയതിനാല്‍ തന്നെ ഇടവിട്ടുള്ള കെ.എസ്.ആര്‍.ടി.സി ബസുകളും ജീപ്പുകളുമാണ് ഇവിടെ എത്താനുള്ള പ്രധാന യാത്രാ മാര്‍ഗം. മലകളും താഴ്‌വരകളും വെള്ളച്ചാട്ടങ്ങളും നിറഞ്ഞ പ്രകൃതി രമണീയമായ സുന്ദരഗ്രാമമാണ് കക്കാടംപൊയില്‍.
365 ദിവസവും കുളിര് തരുന്ന തണുത്ത കാലാവസ്ഥയാണ് കക്കാടംപൊയിലിന്റെ പ്രധാന ആകര്‍ഷണം. പച്ചപ്പ് പുതച്ച പ്രകൃതിയുടെ വിഭവ സമ്പത്ത് ആവോളം ആസ്വദിക്കുന്നതോടൊപ്പം തണുപ്പിന്റെ കുളിര് കൂടി അനുഭവിക്കാനാണ് വിനോദസഞ്ചാരികള്‍ ഇവിടേക്ക് ഒഴുകിയെത്തുന്നത്. കുരിശുമല ഉള്‍പ്പെടെ ധാരാളം ട്രക്കിങ് സ്‌പോട്ടുകളുള്ള ഇവിടം സാഹസിക യാത്രികര്‍ക്ക് പ്രിയപ്പെട്ട സ്ഥലം കൂടിയാണ്. കോഴിപ്പാറയാണ് കക്കാടംപൊയിലിലെ ആകര്‍ഷകമായ വെള്ളച്ചാട്ടം. കേരള സിംഹം പഴശ്ശിരാജ ഒളിവില്‍ താമസിച്ചിരുന്ന പഴശ്ശി ഗുഹയും വിനോദ സഞ്ചാരികള്‍ക്കായി കക്കാടംപൊയില്‍ കാത്ത് വച്ചിരിക്കുന്നു. കണ്ണിനും മനസിനും വിരുന്നൊരുക്കുന്നിടമാണിവിടം.
കൃഷിക്ക് പ്രാധാന്യം നല്‍കിയുള്ള ഇവിടുത്തെ ജനജീവിതം കണ്ടു മനസിലാക്കാന്‍ എത്തുന്നവരും കുറവല്ല. അടയ്ക്ക, കൊക്കോ, കാപ്പി, കുരുമുളക്, വാനില, തേങ്ങ തുടങ്ങിയവ തിങ്ങി നിറഞ്ഞ നാട്ടുപ്രദേശങ്ങള്‍ നയനാനന്ദകരമായ കാഴ്ചയാണ് നല്‍കുന്നത്.